ភ្នំពេញៈ បុរសម្នាក់រងរបួសយ៉ាងធ្ងន់ធ្ងរ រហូតដល់ស្លាប់បាត់បង់ជីវិត បន្ទាប់ពីត្រូវបានគេវាយ កាលពីល្ងាចថ្ងៃទី២៧ ខែឧសភា ឆ្នាំ២០១៩ ត្រង់ចំណុចហាងល្អពេញចិត្ត ផ្ដិត និងថតរូប ស្ថិតតាមបណ្ដោយផ្លូវព្រះមុនីរ៉េត សង្កាត់ទួលស្វាយព្រៃទី២ ខណ្ឌចំការមន។

ជនរងគ្រោះ ឈ្មោះ ផុន សាលីន អាយុ២៨ឆ្នាំ មុខរបរបុគ្គលិកហាង ស្នាក់នៅផ្ទះលេខ១៤៣ ផ្លូវ២៨៦ សង្កាត់ទួលស្វាយព្រៃ២ ខណ្ឌចំការមន ។ ដោយឡែកជនសង្ស័យ ឈ្មោះ ឈុន ឌឹម អាយុ២៦ឆ្នាំ ស្នាក់នៅផ្ទះលេខ១៤៣ ផ្លូវ២៨៦ សង្កាត់ទួលស្វាយព្រៃ២ ខណ្ឌចំការមន (រត់គេចខ្លួន)។

ប្រភពពីប្អូនថ្លៃជនរងគ្រោះ បានឲ្យដឹងថា ជនសង្ស័យ បានប្រើបំពុងទីបវាយលើបងប្រុសខ្លួន នៅទីតាំងកើតហេតុ បណ្តាលឲ្យរងរបួសយ៉ាងធ្ងន់ធ្ងរ និងបានដឹកបញ្ជូនទៅសង្គ្រោះ នៅមន្ទីរពេទ្យកាល់ម៉ែត តែស្ថានភាពធ្ងន់ធ្ងរផ្នែកក្បាលពេក ខាងក្រុមគ្រួសារ បានសម្រេចបញ្ជូលទៅប្រទេសវៀតណាម ប៉ុន្តែទៅដល់ពាក់កណ្តាលផ្លូវ បានដាច់ខ្យល់ស្លាប់តែម្ដង។

មូលហេតុ៖ ជនសង្ស័យប្រចណ្ឌពន្ធ ជាមួយជនរងគ្រោះ។

បច្ចុប្បន្ន សមត្ថកិច្ច កំពុងធ្វើការស្រាវជ្រាវ ដើម្បីតាមចាប់ជនសង្ស័យយកមកផ្ដន្ទាទោសតាមច្បាប់៕