ភ្នំពេញ: កាលពីវេលាម៉ោង ២និង១៥នាទីរសៀល ថ្ងៃទី២៧ ខែមិថុនា ឆ្នាំ២០១៩ នៅលើកំណាត់ផ្លូវ៥០ ម៉ែត្រ កែងផ្លូវបេតុងច្រកចូល ក្នុងភូមិព្រែកថ្លឹង សង្កាត់ជើងឯក រាជធានីភ្នំពេញ មានករណីគ្រោះថ្នាក់ចរាចរណ៍រវាងរថយន្តកុងតឺន័រ១គ្រឿង បើកបរក្នុងល្បឿនលឿនដូចហោះ ជ្រុលទៅបុករថយន្ដ លុច ស៊ីសស៊េរីទំនើប HS250h ដែលកំពុងបើកបរឆ្លងផ្លូវយ៉ាងពេញទំហឹង រួចបន្តទៅបុករ៉ឺម៉កលក់ភេសជ្ជ: ១គ្រឿងទៀត។

ជនរងគ្រោះដែលរងរបួសធ្ងន់ ស្រាលនោះមិនត្រូវបានស្គាល់អត្តសញ្ញាណនៅឡើយទេ និងត្រូវបានបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗដែរ។

ដំណើររឿង៖ នៅមុនពេលកើតហេតុ រថយន្ដកុងតឺន័របើកបរក្នុងល្បឿនលឿន ធ្វើដំណើរក្នុងទិសដៅពីកើតទៅលិចដូចហោះ លុះពេលទៅដល់ត្រង់ចំណុចកើតហេតុ បានវ៉ាក់អើជាមួយរថយន្ដស៊េរីទំនើប ១គ្រឿងម៉ាក លុច ស៊ីស ពណ៌ខ្មៅ ពាក់ស្លាកលេខកណ្ដាល2D-8789 ដែលបើកបរដោយស្ត្រីម្នាក់មានកូនស្រីរួមដំណើរជាមួយផ ​ដែលកំពុងធ្វើដំណើរក្នុងទិសដៅពីកើតទៅលិច បន្ទាប់មកបានបត់ឆ្វេងឆ្លងផ្លូវ ក្នុងបំណងចូលទៅក្នុងភូមិព្រែកថ្លឹង ខណ:នោះដោយសារតែរថយន្តកុងតឺន័របើកលឿន ទើបជាន់ហ្វ្រាំងមិនជាប់ហើយ ក៏ជ្រុលទៅបុកចំពាក់កណ្ដាលរថយន្ដ លុច ស៊ីស បណ្ដាលឲ្យរងការខូចខាតមួយចំហៀង និងរងរបួសអ្នកជិះក្នុងរថយន្ដនោះទាំងពីរនាក់ម្ដាយកូនតែម្ដង បន្ទាប់មករថយន្ដកុងតឺន័រខាងលើ បានជ្រុលបន្តទៅបុករ៉ឺម៉កលក់ភេសជ្ជ:ដែលដាក់លក់នៅលើចិញ្ចើមផ្លូវ បណ្ដាលឲ្យធ្លាក់ចូលទៅក្នុងប្រឡាយទឹក ហើយអ្នកលក់ភេសជ្ជ:រងរបួសដែរ រីប៉ុន្តែសំណាងល្អមិនក្រឡាប់។

ក្រោយពីកើតហេតុជនរងគ្រោះ ត្រូវរថយន្ដសាមុយដឹកយកទៅសង្គ្រោះនៅមន្ទីរពេទ្យ ចំណែកវត្ថុតាង កម្លាំងនគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះធ្វើការវាស់វែងទៅរក្សាទុក នៅអធិការដ្ឋាននគរបាល រង់ចាំការដោះស្រាយតាមនីតិវិធី។

សូមបញ្ជាក់៖ ករណីនេះ តៃកុងរថយន្តកុងតឺន័រចុះរត់គេចខ្លួនបាត់ស្រមោល៕