កំពង់ស្ពឺៈ បុរសម្នាក់បានស្លាប់ភ្លាមៗ និង៣នាក់ ឪពុកកូន របួសធ្ងន់ និងស្រាល ក្នុងឧបទ្ទវហេតុគ្រោះថ្នាក់ចរាចរណ៍ រវាងម៉ូតូ និងម៉ូតូបុកគ្នាពេញមួយទំហឹង កាលពីវេលាម៉ោង៧និង១៨នាទីយប់ថ្ងៃទី១៧ ខែកក្កដា ឆ្នាំ២០១៦ ស្ថិតលើផ្លូវក្រាលស៊ូ ចំណុច ភូមិខ្នងក្រាំង ឃុំតាំងសំរោង ស្រុកភ្នំស្រួច ខេត្តកំពង់ស្ពឺ។

នគរបាលស្រុកភ្នំស្រួចបានឲ្យដឹងថា គ្រោះថ្នាក់ចរាចរណ៍នេះបង្កឡើងដោយម៉ូតូ និងម៉ូតូបើកបរក្នុងទិសដៅបញ្ច្រាសគ្នា ម៉ូតូទី១ ម៉ាកវ៉េវ ពណ៌ក្រហម ពាក់ស្លាកលេខកំពង់ស្ពឺ 1A-0625 អ្នកបើកបរ មានឈ្មោះ ហ៊ឹម ចាន់ថន ភេទប្រុស អាយុ២៥ឆ្នាំ នៅភូមិអន្លង់ខ្លឹង ឃុំមហាសាំង ស្រុកភ្នំស្រួច ខេត្តកំពង់ស្ពឺ បណ្តាលឲ្យស្លាប់ នៅនឹងកន្លែងកើតហេតុ ។ ម៉ូតូទី២ ម៉ាកវីវ៉ា ពណ៌ក្រហម គ្មានស្លាកលេខមកពីទិសខាងកើតទៅលិចបញ្ច្រាសទិស គ្នាបើកបរដោយឈ្មោះ ឈឹម សារ៉ន ភេទប្រុសអាយុ៥០ឆ្នាំ នៅភូមិព្រៃធំ ឃុំរស្មី សាមគ្គី ស្រុកឱរ៉ាល់ រងរបួសធ្ងន់ និងអ្នកជិះពីក្រោយមួយឈ្មោះ ឈួន ដារា ភេទប្រុស អាយុ០៨ឆ្នាំ នៅភូមិព្រៃធំរងធ្ងន់ ឈ្មោះ ឈឹម ចាន់រី ភេទស្រី អាយុ ២០ឆ្នាំ របួសស្រាល ត្រូវបានបញ្ជូនភ្លាមៗនៅមន្ទីរពេទ្យ។

សមត្ថកិច្ចបន្ដថា មុនពេលកើតហេតុម៉ូតូទាំង២គ្រឿងធ្វើដំណើរតាមផ្លូវក្រាលកៅស៊ូក្នុងល្បឿនលឿន ហើយមេឃងងឹតរកភ្លៀងផងនោះ បានបុកគ្នាពេញមួយទំហឹងបណ្តាលឲ្យស្លាប់ម្នាក់នៅកន្លែង និង៣នាក់ឪពុកកូនរងរបួសធ្ងន់ ត្រូវបានបញ្ជូនសង្គ្រោះក្នុងមន្ទីរពេទ្យ ខេត្ត កំពង់ស្ពឺ។

បច្ចុប្បន្នម៉ូតូទាំង២គ្រឿងត្រូវបានសមត្ថកិច្ចយកទៅរក្សាទុក ដើម្បីកសាងសំណុំរឿងរង់ចាំដោះស្រាយគ្នាតាមច្បាប់៕