តាកែវៈ កាលពីវេលាម៉ោង ៦និង៥៤នាទីល្ងាចថ្ងៃទី២៧ ខែកក្កដា ឆ្នាំ២០១៩ ស្ថិតនៅលើផ្លូវលេខ១៤១ ក្នុងភូមិតាលាក់ខាងត្បូង ឃុំគុស ស្រុកត្រាំកក់ មានករណីគ្រោះថ្នាក់ចរាចរណ៍ រវាងម៉ូតូនិងថ្មើរជើង ក្នុងទិសដៅបញ្ច្រាសគ្នា។

ម៉ូតូម៉ាកហុងដា C125 ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ កំពង់ធំ 1J-2850 បើកបរដោយឈ្មោះ រស់ សុធារ៉ា ភេទប្រុស អាយុ១៧ឆ្នាំ មុខរបរសិស្ស នៅភូមិត្រពាំងអំពិល ឃុំគុស ស្រុកត្រាំកក់ ខេត្តតាកែវ (រងរបួសស្រាល) ធ្វើដំណើរពីទិសខាងត្បូង មកដល់ចំណុចខាងលើ បានបុកអ្នកថ្មើរជើងម្នាក់ឈ្មោះ ណោម អិត ភេទស្រី អាយុ៥៥ឆ្នាំ មុខរបរកសិករ នៅភូមិឃុំកើតហេតុខាងលើ (រងរបួសធ្ងន់) ខណៈកំពុងដើរឆ្លងផ្លូវពីលិចទៅកើត។ ភ្លាមៗផងដែរ ជនរងគ្រោះ ត្រូវបានដឹកបញ្ជូនទៅសង្គ្រោះ នៅមន្ទីរពេទ្យក្រុងដូនកែវ។

ក្រោយពេលកើតហេតុសមត្ថកិច្ច ក៏បានចុះមកដល់ រួចកសាងសំណុំរឿងទៅតាមនីតិវិធី រីឯវត្ថុតាងម៉ូតូខាងលើ ត្រូវបានយកមករក្សាទុកនៅប៉ុស្តិ៍នគរបាលរដ្ឋបាលគុស៕