ឧត្តរមានជ័យៈ បុរសវ័យចំណាស់ម្នាក់ បានជិះម៉ូតូយកមកផ្ញើផ្ទះគេ ហើយដើរទៅមើលស្រូវ របស់ខ្លួន ចំម្ចាស់ផ្ទះ ដែលគាត់ផ្ញើមិនបាននៅផ្ទះ ចោរមានឱកាសកាច់.កយកទៅដោយសុវត្ថិភាព។

ករណីនេះ បានកើតឡើងកាលពីវេលាម៉ោង៨និង៣០នាទីថ្ងៃទី២ ខែសីហា ឆ្នាំ២០១៦ ជនរងគ្រោះជាម្ចាស់ម៉ូតូមានឈ្មោះ មិញ រាំ ភេទប្រុស អាយុ៥១ឆ្នាំ រស់នៅភូមិ ដូនកែន សង្កាត់សំរោង ក្រុងសំរោង ខេត្តឧត្តរមានជ័យ។

ជនរងគ្រោះ បានឲ្យដឹងថា គាត់បានជិះម៉ូតូហុងដា សេ១២៥ ពណ៌ខ្មៅ ស៊េរី២០១៤ ពាក់ស្លាកលេខ ឧត្តរមានជ័យ ១A-១២០៣ បានយកមកផ្ញើទុកនៅផ្ទះឈ្មោះ សៀក តឹង ភេទប្រុស អាយុ២១ឆ្នាំ រស់នៅភូមិអំពិល ឃុំពង្រ ស្រុកចុងកាល់ ខេត្តឧត្តរមានជ័យ ហើយរូបគាត់បានដើរទៅមើលស្រូវរបស់គាត់ តែម្ចាស់ផ្ទះក៏មិនបាននៅផ្ទះទេ ដោយយកបាយទៅឲ្យម្តាយនៅឯចំការដែរ ហើយក៏ទុកម៉ូតូចាក់សោចោលនៅក្រោមផ្ទះ។ លុះប្រហែលជា០២ម៉ោង ទើបត្រឡប់មកផ្ទះវិញ ស្រាប់តែបាត់ម៉ូតូ ហើយបានរាយការណ៍ជូនសមត្ថកិច្ចប៉ុស្តិ៍ពង្រ ដើម្បីធ្វើការតាមរក៕