បន្ទាយមានជ័យៈ ក្មេងស្រីម្នាក់ដែលឪពុកម្តាយកំពុងពេញស្រលាញ់ បានរត់ឆ្លងផ្លូវតាមម្តាយទៅទិញម្ហូប ត្រូវបានរថយន្តដឹកដីបុក កិនស្លាប់យ៉ាងអាណោចអាធម ។ ហេតុការណ៍ដ៏គួរឲ្យរន្ធត់នេះបានកើតឡើងវេលាម៉ោង ១៧និង១៥នាទីថ្ងៃទី២៩ ខែកក្កដា ឆ្នាំ២០១៩ នៅចំណុចមុខផ្សារពង្រ ស្ថិតក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ។
បើតាមប្រភពនៅកន្លែងកើតហេតុបានឲ្យដឹងថា ក្មេងស្រីរងគ្រោះត្រូវបានគេស្គាល់ឈ្មោះ លិន ស្រីណាន់ អាយុ៤ឆ្នាំ នៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ មុនពេលកើតហេតុ គេឃើញម្តាយដឹកក្មេងស្រីរងគ្រោះមកទិញម្ហូបនៅផ្សារពង្រ ដោយទុកកូនឲ្យនៅចាំម៉ូតូ រួចដើរឆ្លងផ្លូវទៅទិញម្ហូប ស្រាប់តែកូនស្រីបានរត់តាមពីក្រោយម្តាយដោយមិនដឹងខ្លួន ស្របពេលនោះក៏មានរថយន្តដឹកដីប្រភេទកង់១០ ដឹកដី មួយគ្រឿងពាក់ស្លាក់លេខ បន្ទាយមានជ័យ 3A-2222 បានបុក និងកិនក្មេងស្រីនោះខ្ទេចមើលលែងយល់ស្លាប់ភ្លាមៗនៅកន្លែងកើតហេតុ ។ ចំណែកម្ចាស់រថយន្តមិនត្រូវបានគេស្គាល់ឈ្មោះនោះទេ ក្រោយពេលកើតហេតុត្រូវបានសមត្ថកិច្ចឃាត់ខ្លួនបាននៅនឹងកន្លែងភ្លាមៗ ហើយបញ្ជូនទៅការិយាល័យនគរបាលចរាចរណ៍ខេត្តតែម្តង ព្រោះក្រែងកើតមានអំពើហិង្សាពីក្រុមគ្រួសារ និងប្រជាពលរដ្ឋនៅទីនោះ ។
ក្រោយមកសមត្ថកិច្ចបានធ្វើការវាស់វែង ចំពោះវត្ថុតាងរថយន្ត នគរបាលចរាចរណ៍ខេត្តយកទៅរក្សាទុក ដើម្បីដោះស្រាយតាមនីតិវិធីច្បាប់ ។ រីឯសពក្មេងស្រីរងគ្រោះត្រូវបានសមត្ថកិច្ច ប្រគល់ជូនក្រុមគ្រួសារ ដើម្បីចាត់ចែងធ្វើបុណ្យតាមប្រពៃណី។
ទាក់ទិនទៅនឹងករណីគ្រោះថ្នាក់ចរាចរណ៍ បើតាមការរៀបរាប់ពីប្រជាពលរដ្ឋនៅទីនោះ បាននិយាយរិះគន់យ៉ាងចាស់ដៃ ចំពោះរថយន្តដឹកដី ដែលធ្វើចរាចរណ៍តាមផ្លូវជាតិលេខ៥៦A នេះ គឺតែងតែបើកបរលឿនៗ មិនគិតថាទីប្រជុំជននោះទេ ពិសេសគឺពួកអ្នកបើកបរស៊ីឈ្នួលឲ្យគេ ព្រោះអាងថាមិនមែនរថយន្តរបស់ខ្លួន ហើយបើមានបញ្ហាគឺម្ចាស់រថយន្តជាអ្នកចូលខ្លួនដោះស្រាយ៕
មតិយោបល់