ផ្ទះ ព័ត៌មានជាតិ កម្លាំង​នគរបា...

កម្លាំង​នគរបាល​ ឃាត់ខ្លួន​ជនជាតិ​ហ្វី​លី​ពី​ន​ ៥​នាក់​ ពី​បទ​ល្បួង​លេងល្បែង​គាប​យក​ប្រាក់​ និង​គ្មាន​លិខិតឆ្លងដែន​ជាប់​នឹង​ខ្លួន​

0

ភ្នំពេញ: យោងតាមផេកនគរបាលជាតិ បានឲ្យដឹងថា​ កាលពី​វេលា​ម៉ោង​ ១៤ ​និង​១០​នាទី​ថ្ងៃ​ទី​០៧​ ខែសីហា​ ឆ្នាំ​២០១៩​ មាន​ជនជាតិ​អូស្ត្រាលី​ម្នាក់​ឈ្មោះ​ WILLIAM​ FRANCIS​ SCHOUTEN​ ភេទ​ប្រុស​ អាយុ​៦៨​ឆ្នាំ​ បាន​មក​ដាក់​ពាក្យបណ្ដឹង​នៅ​ ការិយាល័យ​ស៊ើបអង្កេត​ និង​អនុវត្ត​នីតិវិធី​ ផែនការ​ងារ​អន្តោប្រវេសន៍​ នៃ​ស្នងការដ្ឋាន​នគរបាល​រាជធានី​ភ្នំពេញ​ ពី​បទ​ជនជាតិ​ហ្វី​លី​ពី​ន​ ចំនួន​០៣​នាក់​ បាន​ល្បួង​គាត់​យក​ទៅ​ផ្ទះ​ និង​លេងល្បែង​គាប​យក​ប្រាក់​ សរុប​លុយ​ដុល្លារ​អូស្ត្រាលី​ចំនួន​ ៣៥០$​ និង​លុយ​បាត​ថៃ​ចំនួន​ ១២,០០០​បាត​ និង​ទូរ​សព្ទ័​ម៉ាក​IPHONE​ ចំនួន​០២​គ្រឿង​ (​កាលពី​ថ្ងៃ​ទី​០៦​ ខែសីហា​ ឆ្នាំ​២០១៩)​។​

​នៅ​វេលា​ម៉ោង​១៨​និង​៣០​នាទី​ ដោយ​បានការ​អនុញ្ញាត​ពី​លោក​ ឧត្តមសេនីយ៍ត្រី​ សរ​ សំណាង​ ស្នងការ​រង​ទទួល​ផែនការ​ងារ​អន្តោ​ប្រវេ​ស​ នៃ​ស្នងការដ្ឋាន​នគរបាល​រាជធានី​ភ្នំពេញ​ និង​លោក​ កែវ​ សុធា​ ជា​ព្រះរាជអាជ្ញា​អម​សាលាដំបូង​រាជធានី​ភ្នំពេញ​ ការិយាល័យ​ស៊ើបអង្កេត​ និង​អនុវត្ត​នីតិវិធី​ ដឹកនាំ​ដោយ​លោក​វរសេនីយ៍ទោ​ ជា​ ចិ​ត្រា​ ជា​នាយការិយាល័យ​ សហការ​ជាមួយ​កម្លាំង​សមត្ថកិច្ច​មូលដ្ឋាន​ប៉ុស្តិ៍​នគរបាល​រដ្ឋបាល​បឹង​ទំពុន​១​ ខណ្ឌមានជ័យ​ រាជធានី​ភ្នំពេញ​ បាន​ត្រួតពិនិត្យ​ និង​ឃាត់ខ្លួន​ជនជាតិ​ហ្វី​លី​ពី​ន​ចំនួន​០៥​នាក់​(​ស្រី​០៣​នាក់​)​ នៅ​ចំណុច​ផ្ទះ​ជួល​លេខ​១១០​ ផ្លូវ​លេខ​១៣BT​ សង្កាត់​បឹង​ទំពន់​១​ ខណ្ឌមានជ័យ​ រាជធានី​ភ្នំពេញ​ ពី​បទ​ល្បួង​លេងល្បែង​គាប​យក​ប្រាក់​ ពី​ជនជាតិ​អូស្ត្រាលី​ និង​គ្មាន​លិខិតឆ្លងដែន​ជាប់​នឹង​ខ្លួន​។​

​លោក​វរសេនីយ៍ទោ​ ជា​ ចិ​ត្រា​ ជា​នាយការិយាល័យ​ស៊ើបអង្កេត​ និង​អនុវត្ត​នីតិវិធី​ បានឱ្យ​ដឹង​ថា​ជនបរទេស​ទាំង​៥​នាក់​ដែល​នគរបាល​ឃាត់ខ្លួន​រួម​មាន៖​ទី​១.​ឈ្មោះ​ FERNANDO​ MANALA​ ANGELES​ ភេទ​ប្រុស​ អាយុ​៥៥​ឆ្នាំ​ (​គ្មាន​លិខិតឆ្លងដែន​ជាប់​នឹង​ខ្លួន​),​ ទី​២.​ឈ្មោះ​ KANOLOFELI​ ZARDOROZAS​ ភេទ​ប្រុស​ អាយុ​៧៥​ឆ្នាំ​ (​គ្មាន​លិខិតឆ្លងដែន​ជាប់​នឹង​ខ្លួន​),​ ទី​៣.​ឈ្មោះ​ MALOU​ R.ODICTA​ ភេទ​ស្រី​ អាយុ​៤០​ឆ្នាំ​ (​គ្មាន​លិខិតឆ្លងដែន​ជាប់​នឹង​ខ្លួន​)​ មានកូន​ស្រី​តូច​ អាយុ​០៦​ខែ​ មក​ជាមួយ​,​ ទី​៤.​ឈ្មោះ​ JUDY​ MONTERO​ DELOS​ SANTOS​ ភេទ​ស្រី​ អាយុ​៤៩​ឆ្នាំ​ និង​ទី​៥.​ឈ្មោះ​ MARLLYN​ JUEGO​ ORQUIOLA​ ភេទ​ស្រី​ អាយុ​៤៦​ឆ្នាំ​ (​គ្មាន​លិខិតឆ្លងដែន​ជាប់​នឹង​ខ្លួន​)​។​

​ដោយ​បានការ​អនុញ្ញាត​ពី​លោក​ កែវ​ សុធា​ ព្រះរាជអាជ្ញា​អម​សាលាដំបូង​រាជធានី​ភ្នំពេញ​ ឲ្យ​ធ្វើ​កិច្ចសន្យា​ ចំពោះ​ស្ត្រី​ឈ្មោះ​ MALOU​ R.ODICTA​ មានកូន​ស្រី​តូច​ អាយុ​០៦​ខែ​ ឲ្យ​ត្រឡប់​ទៅ​កន្លែង​ស្នាក់​នៅ​វិញ​ និង​ត្រូវ​យក​ឯកសារ​ដែល​ពាក់ព័ន្ធ​មក​បង្ហាញ​សមត្ថកិច្ច​នៅ​ពេល​ក្រោយ​ ការិយាល័យ​ស៊ើបអង្កេត​ និង​អនុវត្ត​នីតិវិធី​ ផែនការ​ងារ​អន្តោប្រវេសន៍​ នៃ​ស្នងការដ្ឋាន​នគរបាល​រាជធានី​ភ្នំពេញ​។​ បច្ចុប្បន្ន​កម្លាំង​ការិយាល័យ​កំពុង​សាកសួរ​និង​អនុវត្ត​នីតិវិធី​បន្ត​ ៕

មតិយោបល់

Loading...