ផ្ទះ ព័ត៌មានជាតិ ចុមល្បិចខ្ពស់...

ចុមល្បិចខ្ពស់ម្លេះ!! ស្ត្រី​ម្នាក់ប្រើ​ល្បិច​លួច​ដក​ប្រាក់​តាម​ប្រព័ន្ធ​វី​ង និង​ទ្រូ​ម៉ា​នី​ចំនួន​ជាង ​២​ម៉ឺន​ដុល្លារ

0

ភ្នំពេញ: ស្ត្រី​ម្នាក់​ដែល​តែង​ដើរ​បោក​លុយ​តាម​ប្រព័ន្ធ​បើកប្រាក់​វី​ង Wing និង ទ្រូ​ម៉ា​នី True Money ត្រូវបាន​នាយក​ដ្ឋា​ន​ជំនាញ​ប្រយុទ្ធ​ប្រឆាំងនឹង​បទល្មើស​បច្ចេកវិទ្យា ឃាត់ខ្លួន​និង​បញ្ជូនទៅ​តុលាការ​ថ្ងៃទី​២៩​ ខែសីហា ឆ្នាំ២០១៩​នេះ ក្រោយ​ការប្រព្រឹត្ត​បទល្មើស​ជាក់ស្តែង និង​យោងតាម​បណ្តឹង​ជា​បន្តបន្ទាប់​របស់​ប្រជាពលរដ្ឋ​។​

ស្ត្រី​សង្ស័យ​ឈ្មោះ ឃាង ស្រី​ណា អាយុ ​៣៦​ឆ្នាំ ត្រូវបាន​សមត្ថកិច្ច​ឃាត់ខ្លួន​នៅក្រោយ​វត្ត​មហាមន្ត្រី កាលពី​ថ្ងៃទី​២៦ ខែសីហា ឆ្នាំ២០១៩ ក្រោម​ការសម្របសម្រួល​របស់លោក កែវ សុធា ព្រះរាជអាជ្ញា​នៃ​អយ្យការ​អម​សាលាដំបូង​រាជធានី​ភ្នំពេញ​។​

​ប្រធាន​នាយកដ្ឋាន​ជំនាញ​ប្រយុទ្ធ​ប្រឆាំងនឹង​បទល្មើស​បច្ចេកវិទ្យា លោក​ឧ​ត្ត​ម​សេនីយ៍​ឯក ជា ពៅ បាន​ប្រាប់​អ្នកសារព័ត៌មាន​នៅ​ព្រឹក​ថ្ងៃទី​២៩ សីហា​នេះ​ថា ពាក្យបណ្តឹង​ដែល​សមត្ថកិច្ច​បានទទួល​ពាក់ព័ន្ធ​នឹង​អំពើ​បោកប្រាស់​នេះ​មាន​ចំនួន​៤ សរុប​ចំនួន​ទឹកប្រាក់​២០,៩០០​ដុល្លារ​អាមេរិក ដែល​ករណីនេះ​បាន​ជំរុញ​ការប្រញាប់​ចុះ​ធ្វើការ​ស៊ើបអង្កេត​តាមដាន និង​បាន​ឃាត់ខ្លួន​ស្ត្រី​សង្ស័យ​ក្បែរ​កន្លែង​ផ្ញើ​ប្រា​ក់វី​ង​មួយកន្លែង​នៅ​ជិត​វត្ត​មហាមន្ត្រី​ក្នុង​ខណ្ឌចម្ការមន រាជធានី​ភ្នំពេញ​។

​យោងតាម​នាយកដ្ឋាន​ជំនាញ​ប្រយុទ្ធ​ប្រឆាំងនឹង​បទល្មើស​បច្ចេកវិទ្យា ស្ត្រី​សង្ស័យ​រូបនោះ ពេលធ្វើ​សកម្មភាព​បោក​បញ្ឆោត​ក្នុង​កន្លែង​បើកប្រាក់​វី​ង​ឬ ទ្រូ​ម៉ា​នី នៅ​កន្លែង​ណាមួយ គាត់​តែង​និយាយ​បញ្ជាក់ប្រាប់​ភ្នាក់ងារ​ដក​លុយ​នោះ​ជាមុន​ថា គាត់​ជា​អ្នករស់នៅ​ផ្ទះ​ជិត​នេះ​ទេ ដែល​ការនិយាយ​នោះ គឺ​ដើម្បី​ឲ្យ​ភ្នាក់ងារ​បើកប្រាក់​នោះ ទុកចិត្ត​និង​ធ្វើ​ប្រតិបត្តិការ​ផ្ទេរប្រាក់​ដាក់​ទៅ​លេខ​ទូរស័ព្ទ ០៩៦ ២៣៩ ៣១៨៦ ជាមុន​ដើម្បី​ទទួលបាន​វិក្កយបត្រ និង​លេខ​កូដ​សម្ងាត់ ។ ក្រោយមក​ស្ត្រី​ដដែល​នោះ ធ្វើជា​និយាយទៀតថា គាត់​ភ្លេច​ប្រាក់ និង​ចាំ​ទៅយក​ប្រាក់​ពី​ផ្ទះ​មក​សិន ។ បន្ទាប់ពី​បាន​លេខ​កូដ​សម្ងាត់​នោះ​ហើយ ស្ត្រី​ដដែល​នោះ​គាត់​បាន​ហៅ​ម៉ូតូឌុប​ជិះ​ចេញទៅ​កន្លែង ផ្សេង​ធ្វើ​ការដក​ប្រាក់​ហើយ​គេចខ្លួនបាត់ ។ អ្នករត់ម៉ូតូឌុប​នោះ បាន​សហការ​ជាមួយ​សមត្ថកិច្ច ជុំវិញ​ការឃាត់ខ្លួន​ជនសង្ស័យ​នេះ​នៅ​ទីតាំង​មួយកន្លែង​របស់​វី​ង​នៅ​ជិត​វត្ត​មហាមន្ត្រី​ក្នុង​ខណ្ឌចម្ការមន រាជធានី​ភ្នំពេញ​។​
​ស្ត្រីជន​សង្ស័យ ឃាង ស្រី​ណា ត្រូវបាន​ប​ញ្ជួ​ន​ទៅ​តុលាការ​ដើម្បី​ធ្វើការ​ចោទប្រកាន់​តាមផ្លូវ​ច្បាប់ ។ ប្រធាន នាយកដ្ឋាន​ជំនាញ​ប្រយុទ្ធប្រឆាំង​និង​បទល្មើស​បច្ចេកវិទ្យា លោក​ឧ​ត្ត​ម​សេនីយ៍​ឯក ជា ពៅ បាន​អំពាវនាវ​យ៉ាង​ដូច្នេះ​ប្រាប់​អ្នកកាសែត «​ក្នុងនាម​នាយកដ្ឋាន​ប្រឆាំង​បទល្មើស​បច្ចេកវិទ្យា​និង​បទបញ្ជា ក្រសួង និង​អគ្គស្នងការ​នគរបាល​ជាតិ សូម​អំពាវនាវ​ដល់​ប្រជាពលរដ្ឋ​ដែល​ប្រើប្រាស់​មីក្រូហិរញ្ញវត្ថុ​នៅ​ទីផ្សារ​បច្ចុប្បន្ន សូម​ឲ្យ​មាន​ប្រុងប្រយ័ត្ន​ទាំង​អ្នកប្រើប្រាស់ ទាំង​អ្នក​ម្ចាស់​មីក្រូហិរញ្ញវត្ថុ​ចំពោះ​ជនខិលខូច​ដែល​ឆ្លៀតឱកាស​យក បញ្ហា​នេះ​មកប្រើប្រាស់​បង្ក​ឲ្យ​មាន​ភាពអសន្តិសុខ​នៅក្នុង​សង្គម បាត់​ស្ថិរភាព បង្អាក់​ការអភិវឌ្ឍន៍ ក្រោម​ការដឹកនាំ​របស់ រាជរដ្ឋាភិបាល ជាពិសេស​គឺ​ការដឹកនាំ​របស់​សម្តេច​តេ​ជោ ហ៊ុន សែន ដែល​ធ្វើ​ឲ្យ​ប្រទេស​មានការ​រីកចម្រើន រុងរឿង និង​ស្ថិរភាព​ដល់​បច្ចុប្បន្ននេះ ។ មានតែ​យើងទាំងអស់គ្នា​ទេ​ជាមួយ​សមត្ថកិច្ច​ជា​បង្អែក​ដែល​ត្រូវ​រួមគ្នា​កម្ចាត់ និង​បំបាត់ចោល​នូវ​ជនខិលខូច​ទាំងអស់នោះ​៕

Loading...

Leave a Reply

This site uses Akismet to reduce spam. Learn how your comment data is processed.