ព្រះសីហនុៈ យោងតាមផេកការិយាល័យផ្សព្វផ្សាយ តាមបណ្តាញសង្គម បានឲ្យដឹងថា នៅថ្ងៃទី១២ ខែតុលា ឆ្នាំ២០១៩ នគរបាលចរាចរណ៍ខេត្តព្រះសីហនុ សូមបំភ្លឺជូនសាធារណជនជ្រាប អំពីករណីគ្រោះថ្នាក់ចរាចរណ៍ធ្ងន់ធ្ងរមួយកើតឡើង កាលពីថ្ងៃទី៣០ ខែកញ្ញា ឆ្នាំ២០១៩ វេលាម៉ោង១១ និង៣០នាទី បណ្តាលឲ្យស្លាប់មនុស្សចំនួន៣ នៅផ្លូវជាតិលេខ៤ ចំណោតអូរត្រាវសង្កាត់លេខ១ ក្រុង/ខេត្តព្រះសីហនុ។
ក្រោយការឃាត់ខ្លួនអ្នកបើកបរ ឈ្មោះ សេង ភារៈ សមត្ថកិច្ចបានរកឃើញមានកំហុសចំនួនបី ផ្សេងៗ គ្នា ៖
ទី១.ឈ្មោះ សេងភារៈ គ្មានប័ណ្ណបើកបរ
ទី២.បើកវ៉ាជែង ក្នុងស្ថានភាពគ្រោះថ្នាក់ (តំបន់ហាមវ៉ា)
ទី៣.ធ្វើតេស្តទឹកនោម មានផ្ទុកនូវសារធាតុញៀន កម្រិតធ្ងន់ ទាំងបីចំណុចខាងលើ សុទ្ធតែមានទោសព្រហ្មទណ្ឌ។
រឿងនេះ បង្កឡើងដោយសារអ្នកបើករថយន្ត STAREX ពណ៌ស ពាក់ស្លាកលេខ កំពត 2B-216 ឈ្មោះ សេង ភារៈ ភេទប្រុស អាយុ ២៦ឆ្នាំ មុខរបររត់តាក់ស៊ី មានលំនៅដ្ឋាននៅភូមិល្បើក ស្រុកឈូក ខេត្តកំពត ដឹកអ្នកដំណើរចំនួន៧នាក់ ( ស្រី ២នាក់ ) ពីខេត្តកំពត មកខេត្តព្រះសីហនុ មកដល់ចំណុចខាងលើ ស្ថានភាពផ្លូវឡើងចំណោត បានវ៉ាជែងរថយន្តធុនធំ ១គ្រឿងម៉ាក HYUNDAI ពណ៌ស ស្លាកលេខភ្នំពេញ3D-0144 អ្នកបើកបរមិនស្គាល់អត្តសញ្ញាណ វ៉ាមិនផុតរួចកៀរហើយបុករថយន្តធុនធំ ១គ្រឿងទៀត ដែលមានទិសដៅផ្ទុយគ្នា ម៉ាក HYUNDAI ពណ៌ស ពាក់ស្លាកលេខ ភ្នំពេញ3D-1142 បន្ទាប់មកបណ្ដាលឲ្យរថយន្តធុនធំទាំងពីរគ្រឿងបុកគ្នាតែម្ដង ។
គ្រោះថ្នាក់នេះ បណ្ដាលឲ្យស្លាប់មនុស្សចំនួន ៣នាក់ នៅនឹងកន្លែងកើតហេតុ និងរងរបួសធ្ងន់ស្រាលមនុស្សមួយចំនួន។
១-អ្នកបើកបររថយន្តធុនធំ ពាក់ស្លាកលេខភ្នំពេញ3D-0144 គាបស្លាប់ ជាប់ក្នុងរថយន្ត ។
២-អ្នករួមដំណើរលើរថយន្ត STAREX ចំនួន២នាក់ ស្លាប់នៅនឹងកន្លែងកើតហេតុ ។
ក្រោយកើតហេតុសមត្ថកិច្ចបាននាំខ្លួន អ្នកបើកបររថយន្តបង្កមកសាកសួរនៅការិយាល័យនគរបាលចរាចរណ៍ផ្លូវគោក ធ្វើតេស្តត្រួតពិនិត្យឃើញមានកំហុសបីយ៉ាងដូចខាងលើ ហើយបានកសាងសំណុំរឿង តាមនីតិវិធីបញ្ជូនទៅសាលាដំបូងខេត្តព្រះសីហនុ៕
មតិយោបល់