ព័ត៌មានជាតិ

សមត្ថកិច្ចបង្រ្កាបករណីចាប់ជំរិតទារប្រាក់ដោយក្រុមជនល្មើសមានគ្នា ៥នាក់ជាជនជាតិចិន នៅក្រុងបាវិត

ស្វាយរៀង: លោកវរសេយ៍ឯក ស្រី វត្ថា មេបញ្ជាការរងទទួលផែនយុត្តិធម៌ នៃទីបញ្ជាការដ្ឋានកងរាជអាវុធហត្ថខេត្តស្វាយរៀង បានឲ្យដឹងថា បន្ទាប់ពីកម្លាំងរបស់លោកទទួលបានព័ត៌មាន និងរូបភាពវីឌីអូប្រើអំពើហិង្សា លើជនរងគ្រោះដែលផ្ញើមកពីប្រទេសចិន ដែលជនសង្ស័យផ្ញើទៅឲ្យអាណាព្យាបាលជនរងគ្រោះយកលុយមកលោះខ្លួនរួចមក កម្លាំងជំនាញកងរាជអាវុធហត្ថ បានធ្វើការពិនិត្យ និងស្រាវជ្រាវថា ទីកន្លែងធ្វើទារុណកម្ម ស្ថិតនៅក្នុងភូមិសាស្ត្រក្រុងបាវិត ខេត្តស្វាយរៀង។

ជនសង្ស័យដែលសមត្ថកិច្ចចាប់ខ្លួនបានរួមមាន៖
១/ឈ្មោះ ហ្វង់ ឈីឆឹង (ហៅក្រៅ ម៉ឺង គ័រ) អាយុ ៤៥ឆ្នាំ ស្នាក់នៅផ្លូវកំពង់ស្ពានក្នុងសណ្ឋាគារ អូលីដេ បន្ទប់លេខ២០៣ ភូមិបាវិតកណ្តាល សង្កាត់បាវិត ក្រុងបាវិត។
២/ឈ្មោះ ធឹង ចាស៊ាង អាយុ ២៨ឆ្នាំ មុខរបរមិនពិតប្រាកដ ស្នាក់នៅមិនពិតប្រាកដ។
ជនរងគ្រោះមានឈ្មោះដូចខាងក្រោម៖
១/ជនរងគ្រោះឈ្មោះ យ៉ាង អាសឹង អាយុ ២៣ឆ្នាំ មុខរបរមិនពិតប្រាកដ មានទីលំនៅភូមិតាសា សង្កាត់ឡាំងឈីង ក្រុងណាននីង ខេត្តគង់ស៊ីប្រទេសចិន។
២/ឈ្មោះ ល័រ សាវជៀន អាយុ ២៥ឆ្នាំ មុខរបរអាជីវករ ស្នាក់នៅក្រោយផ្សារអន្តរជាតិស្ថិតក្នុងភូមិ បាវិតកណ្តាល សង្កាត់បាវិត ក្រុងបាវិត។
បញ្ជាក់៖ ជនរងគ្រោះត្រូវសមត្ថកិច្ចបញ្ជូនទៅការិយាល័យអន្តោប្រវេសន៍ នៃស្នងការដ្ឋាននគរបាលខេត្តស្វាយរៀង។

ក្រោយទទួលបានការអនុញ្ញាតពីលោក គង់ ច័ន្ទខេមរិទ្ធ ព្រះរាជអាជ្ញា នៃអយ្យការអមសាលាដំបូងខេត្តស្វាយរៀង និងក្រោមបញ្ជាផ្ទាល់របស់ លោកឧត្តមសេយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង នៅយប់ថ្ងៃទី១៤ ខែតុលា ឆ្នាំ២០១៩ កម្លាំងកងរាជអាវុធហត្ថខេត្តស្វាយរៀង សហការជាមួយមូលដ្ឋាន កងរាជអាវុធហត្ថក្រុងបាវិត ដឹកនាំដោយលោកវរសេយ៍ឯក ស្រី វុត្ថា បានបើកប្រតិបត្តិការនៅត្រង់ចំណុចផ្ទះសំណាក់យីហោ មហាជ័យ ធ្វើការឆែកឆេរបន្ទប់ផ្ទះសំណាក់លេខ២៣ ក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង រកឃើញមនុស្សចំនួន ៣នាក់ នៅក្នុងបន្ទប់ក្នុងនោះជនរងគ្រោះ ២នាក់ និងជនសង្ស័យម្នាក់ (ជនជាតិចិនទាំង ៣នាក់)។

រហូតមកដល់ម៉ោង២៣និង១៥នាទីថ្ងៃទី១៦ ខែតុលា ឆ្នាំ២០១៩ កម្លាំងអាវុធហត្ថខេត្តស្វាយរៀង និងកម្លាំងអាវុធហត្ថបាវិត ដឹកនាំដោយលោកវរសេយ៍ទោ ឡឹក ចម្រើន មេបញ្ជាការកងរាជអាវុធហត្ថ ក្រុងបាវិត បានបន្តចុះប្រតិបត្តិការនៅមុខសណ្ឋាគារ JP ស្ថិតក្នុងភូមិបាវិតកណ្តាល សង្កាត់បាវិត ដោយធ្វើការឃាត់ខ្លួនបានជនសង្ស័យម្នាក់ទៀត ជាជនជាតិចិន រួចនាំខ្លួនមកទីបញ្ជាការកង រាជអាវុធហត្ថខេត្ត ដើម្បីសាកសួរ ហើយជនជាតិចិនជាជនសង្ស័យទាំង ២នាក់ បច្ចុប្បន្នកម្លាំងជំនាញកសាងសំណុំរឿង និងវត្ថុតាងបញ្ជូនទៅអយ្យការអមសាលាដំបូងខេត្តចាត់ការតាមផ្លូវច្បាប់៕

មតិយោបល់