កែប: នាថ្ងៃទី១៨ ខែតុលា ឆ្នាំ២០១៩ សមត្ថកិច្ចបានឃាត់ខ្លួនជនបរទេសម្នាក់ ពាក់ព័ន្ធនិងករណីពុំមានប្រាក់គ្រប់គ្រាន់ សម្រាប់បង់ថ្លៃបន្ទប់ស្នាក់នៅ របស់ផ្ទះសំណាក់ អារុណរ:រ៉ូមែន ស្ថិតភូមិថ្មី សង្កាត់ព្រៃធំ ក្រុងកែប ខេត្តកែប។

ជនបរទេសឈ្មោះ Baksalyar Boris ភេទប្រុស អាយុ ៥៨ ឆ្នាំ មុខរបរ ទេសចរណ៍ សញ្ជាតិ Turkmenistan កាន់លិខិតឆ្លងដែន Russian Federation ។

យោងតាម នគរបាលអន្តោប្រវេសន៍ បានឲ្យដឹងថា៖ ជនបរទេសខាងលើ ចូលស្នាក់នៅផ្ទះសំណាក់ អារុណរ:រ៉ូមែន កាលពីថ្ងៃទី១៧ ខែតុលា ឆ្នាំ២០១៩ វេលាម៉ោង ១១ និង ១០នាទី លុះដល់ថ្ងៃទី ១៨ ខែតុលា ឆ្នាំ២០១៩ វេលាម៉ោង ១៥ និង ១០នាទី ហៅទូទាត់ថ្លៃបន្ទប់ ពុំមានប្រាក់បង់ បន្ទាប់មកកម្លាំងនគរបាលបានចុះដល់កន្លែងស្នាក់របស់ជនបរទេសរូបនេះ ដើម្បីធ្វើការស្រាវជ្រាវ។

តាមការបំភ្លឺពីជនបរទេសខាងលើថា កាលពីថ្ងៃទី២៥ ដល់ថ្ងៃទី២៩ ខែមេសា ឆ្នាំ២០១៩ រូបគាត់មានជំងឺ ហើយចូលសម្រាកព្យាបាលក្នុងមន្ទីរពេទ្យកាល់ម៉ែត ក្រោយពេលព្យាបាល ពុំមានប្រាក់ទូទាត់ មន្ទីរពេទ្យក៏រក្សាទុកលិខិតឆ្លងដែន នៅទីនោះរហូតដល់បច្ចុប្បន្ន និងបានស្នាក់នៅផុតការកំណត់។

បច្ចុប្បន្នជនបរទេសរូបនេះ ត្រូវបានបញ្ជូនទៅកាន់ទីស្នាក់ការត្រៀមបណ្តេញចេញ ខេត្តព្រះសីហនុ នៃនាយកដ្ឋានស៊ើបអង្កេត និងអនុវត្តនីតិវិធី។

បញ្ជាក់៖ ជនបរទេសខាងលើ បានចូលមកប្រទេសកម្ពុជា តាមច្រកទ្វារអន្តរជាតិចាំយាម (ខេត្តកោះកុង) កាលពីថ្ងៃទី២៧ ខែវិច្ឆិកា ឆ្នាំ២០១៨ និងបន្តទិដ្ឋាការស្នាក់នៅដល់ថ្ងៃទី២៧ ខែមីនា ឆ្នាំ២០១៩៕