ពោធិ៍សាត់: រថយន្តដឹកទំនិញចំនួន៤គ្រឿង ត្រូវបានសមត្ថកិច្ចនគរបាលចរាចរណ៍ សហការជាមួយក្រសួងសាធារណការនិងដឹកជញ្ជូន អនុវត្តវិធានការកាត់ទ្រុង និងកាត់សាក់ស៊ី ដែលបានកែច្នៃខុសទ្រង់ទ្រាយដើម ។
ប្រតិបត្តិការនេះបានធ្វើឡើងនៅមុខការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តពោធិ៍សាត់ នាព្រឹកថ្ងៃទី២៧ ខែវិច្ឆិកា ឆ្នាំ២០១៩ ដោយមានការចូលរួមពីសមត្ថកិច្ចនគរបាល នៃនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណ: អគ្គស្នងការដ្ឋាននគរបាលជាតិ ដឹកនាំដោយលោកវរសេនីយ៍ឯក ម៉ាន រ៉ាសាក់ នគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តពោធិ៍សាត់ ដឹកនាំដោយលោក ឱ ហ៊ាង ស្នងការរង នៃស្នងការដ្ឋាននគរបាលខេត្ត សហការជាមួយក្រសួងសាធារណការនិងដឹកជញ្ជួន ដឹកនាំដោយលោក តាំង ពៅ និងមន្ទីរសាធារណការនិងដឹកជញ្ជួនខេត្តដឹកនាំដោយលោក ឆាំង ហាវ ។
អ្នកស្រី ចេវ ស្រីចិត្ត ម្ចាស់រថយន្តដែលត្រូវសមត្ថកិច្ចកាត់ទ្រុងរថយន្តនោះ បានសម្តែងនូវការសោកស្តាយ ហើយក៏សំណូមពរឲ្យសមត្ថកិច្ចចាត់វិធានការនេះឲ្យបានស្មើភាពគ្នានៅទូទាំងប្រទេស ។
លោក ឱ ហ៊ាង ស្នងការរងទទួលបន្ទុកការងារចរាចរណ៍ នៃស្នងការដ្ឋាននគរបាលខេត្ត ក៏បានអំពាវនាវដល់ពលរដ្ឋគ្រប់រូប ជាពិសេសម្ចាស់យានយន្តទាំងអស់ចូលរួមអនុវត្តច្បាប់ចរាចរណ៍ឲ្យបានគ្រប់ៗគ្នា ហាមតទ្រុងនិងសាក់ស៊ីដែលខុសពីទ្រង់ទ្រាយដើមនាំឲ្យល្មើសនឹងច្បាប់ ។
សូមបញ្ជាក់ថា ចំពោះម្ចាស់រថយន្តដែលល្មើស នឹងច្បាប់ចរាចរណ៍ផ្លូវគោកនេះ សមត្ថកិច្ចបានឲ្យពួកគាត់ផ្ដិតមេដៃលើកិច្ចសន្សា និងផាកពិន័យតាមច្បាប់កំណត់ ព្រមទាំងប្រមូលដកហូតសំណុំឯកសារ និងស្លាកលេខសម្គាល់យានដើម្បីលុបចេញពីបញ្ជីគ្រប់គ្រងយានយន្តរបស់ក្រសួងសាធារណការ និងដឹកជញ្ជួន(ដោយបញ្ឈប់ទាំងស្រុងការប្រើប្រាស់ និងធ្វើចរាចរណ៍ចាប់ពីថ្ងៃនេះតទៅ) ៕
មតិយោបល់