ភ្នំពេញៈ ផ្ទះល្វែងស្តុកគ្រឿងអេឡិចត្រូនិកមួយកន្លែង ត្រូវបានអគ្គិភ័យលេបត្របាក់ឆេះយ៉ាងសន្ធោសន្ធៅ បណ្ដាលឲ្យបុរស ជាជនបរទេសម្នាក់ រងរបួស និងខូចខាតទ្រព្យសម្បត្តិអស់ប្រមាណជិត១០ម៉ឺនដុល្លារ។

ហេតុការណ៍នេះ បានកើតឡើងកាលពីវេលាម៉ោង ៣និង០០នាទីទៀបភ្លឺ ឈានចូលថ្ងៃទី៣០ ខែវិច្ឆិកា ឆ្នាំ២០១៩ ត្រង់ចំណុចផ្ទះលេខ៤២Eo ផ្លូវលេខ៥ ក្នុងបុរីពិភពថ្មីផ្សារឈូកមាស ភូមិគ្រាំងអង្គ្រង សង្កាត់ក្រាំងធ្នង់ ខណ្ឌសែនសុខ។

តាមប្រភពពីស្ត្រីម្នាក់ ដែលត្រូវជាសាច់ញាតិរបស់ម្ចាស់ បានរៀបរាប់ប្រាប់ឲ្យដឹងថា ផ្ទះល្វែងខាងលើ គឺមានប្តីប្រពន្ធមួយគូ បានជួលសម្រាប់ស្នាក់នៅ និងស្តុបគ្រឿងអេឡិចត្រូនិកជាច្រើន។ នៅមុនពេលកើតហេតុប្តីប្រពន្ធមួយគូខាងលើ បានចាក់សោទ្វារផ្ទះរួច ក៏បានឡើងទៅដេកនៅជាន់ឡៅតឿ ទាំងពីរនាក់ យ៉ាងស្កប់ស្កល់។

លុះដល់វេលាកើតហេតុ ស្រាប់តែមានក្លិនឈ្ងៀម និងឃើញផ្សែងបានហុយ ចេញពីមកជាន់ផ្ទាល់ដី ដែលជាកន្លែងស្តុបគ្រឿងអេឡិចត្រូនិក។ បន្ទាប់មកក៏លេចចេញ ជាអណ្ដាតភ្លើងយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់ប្រជាពលរដ្ឋ ដែលរស់នៅជុំវិញកន្លែងកើតហេតុ នាំគ្នារាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គិភ័យឲ្យចុះមកអន្តរាគមន៍។

ខណៈនោះផងដែរ ប្រជាពលរដ្ឋក៏បាននាំគ្នាជួយទាញទុយោទឹក និងបំពង់ពន្លត់ អគ្គិភ័យ យកទៅបាញ់ពន្លត់ ប៉ុន្តែដោយទ្វារផ្ទះកើតហេតុបានជាប់សោពីខាងក្នុង ទើបមិនអាចជួយពន្លត់បានទាន់ពេលវេលា។

ដោយទ្បែកប្តីប្រពន្ធជាម្ចាស់ផ្ទះ មិនអាចចេញមកតាមខាងក្រោមនោះទេ ព្រោះតែមានអណ្តាតភ្លើងបានឆាបឆេះខ្លាំងពេក ទើបនាំគ្នារត់ឡើង ទៅជាន់ខាងលើផ្លោះឆ្លងទៅផ្ទះ ដែលនៅជាប់នោះ បណ្តាលឲ្យបុរសជាប្តី រងរបួសរយះជើង ត្រូវបញ្ជូនទៅសង្រ្គោះនៅឯមន្ទីរពេទ្យភ្លាមៗ។

ក្រោយមកក៏មានសមត្ថកិច្ចមូលដ្ឋាន និងរថយន្តពន្លត់អគ្គិភ័យ របស់ស្នងការដ្ឋាននគរបាលរាជធានីភ្នំពេញ បានចុះមកអន្តរាគមន៍ និងបានវាយទម្លុះទ្វារចូលទៅបាញ់ទឹកពន្លត់ភ្លាមៗតែម្ដង ទើបអាចគ្រ​ប់គ្រងស្ថានការណ៍បានទាំងស្រុង៕