បាត់ដំបង: ប្រជាពលរដ្ឋប្រទះឃើញ សពយុវជនម្នាក់ ដេកផ្កាប់មុខស្លាប់ នៅក្នុងទឹកអូរ ដោយនៅដៃមានការឧបករណ៍សម្រាប់រកត្រីជាមួយផង ទើបធ្វើឲ្យសមត្ថកិច្ចសន្និដ្ឋានថា ជនរងគ្រោះអាច កើតជំងឺខ្យល់គ ដួលផ្កាប់មុខនៅក្នុងទឹកស្លាប់តែម្តង។

ករណីប្រទះឃើញខាងលើ កាលពីវេលាម៉ោង៦ និង២៣នាទីល្ងាច ថ្ងៃទី២៥ ខែកក្កដា ឆ្នាំ២០១៦ នៅត្រង់ចំណុចអូរតាឆុន ស្ថិតក្នុងភូមិចក្រី ឃុំបារាំងធ្លាក់ ស្រុកភ្នំព្រឹកខេត្តបាត់ដំបង។

នគរបាលស្រុកភ្នំព្រឹក បានបញ្ជាក់ថា ជនរងគ្រោះ អាចកើតខ្យល់គ ហើយបានដួលផ្កាប់មុខស្លាប់នៅក្នុងទឹកអូរនោះតែម្តង ខណ:ដែល ជនរងគ្រោះកំពុងដើររកត្រីនៅក្នុងអូរ ព្រោះនៅដៃមានកាន់កាំបិត និងស្នមួយដើមផង ដោយភ្លាមៗនោះដែរ គឺគ្មានអ្នកណាម្នាក់ស្គាល់ពីសាវតារ ជនរងគ្រោះឡើយ ប៉ុន្តែ ក្រោយមកស្រាប់តែមានសាច់ញាតិមកទទួលយកទៅធ្វើបុណ្យ។

សាច់ញាតិបានដឹងថា ជនរងគ្រោះមានឈ្មោះ និន ប្រុស ភេទប្រុស អាយុ២៨ឆ្នាំ រស់នៅក្នុងភូមិ ឃុំកើតហេតុខាងលើ ដោយសមត្ថកិច្ច បានអះអាងបន្ថែមថា ការស្លាប់របស់ជនរងគ្រោះពុំមានការពាក់ព័ន្ធ ទៅនឹងករណីឃាតកម្មអ្វីឡើយ៕