កំពង់ធំ: កាលពីវេលាម៉ោង ០៩ និង១៥នាទីព្រឹកថ្ងៃទី១៦ ខែធ្នូ ឆ្នាំ២០១៩ លើកំណាត់ផ្លូវជាតិលេខ៦ ចន្លោះគីឡូម៉ែត្រលេខ ២២០-២២១ ភូមិសាមក្អោក ឃុំទ្រា ស្រុកស្ទោង ខេត្តកំពង់ធំ មានករណីគ្រោះថ្នាក់ចរាចរណ៍ រវាងរថយន្តបុកម៉ូតូ បើកឆ្លងកាត់ផ្លូវ បណ្ដាលឲ្យស្លាប់មនុស្សម្នាក់ (ប្រុស)។

រថយន្តម៉ាកហ៊ីនដាយ ពណ៌ស ស្លាកលេខ 51B.09611 របស់ក្រុមហ៊ុនទេសចរណ៍ វៀតណាម ដឹកអ្នកដំណើរ (Vietravel) ធ្វើដំណើរពីជើងទៅត្បូង (សៀមរាប-ភ្នំពេញ) អ្នកបើកបរឈ្មោះ ចឹង ធាងទុង ភេទប្រុស អាយុ៤១ឆ្នាំ ជនជាតិវៀតណាម កាន់លិខិតឆ្លងដែន លេខ B9815089) ស្នាក់នៅផ្ទះលេខ១៩១ សង្កាត់ហាប់ហូខណ្ឌ៩ ក្រុងហូជីមិញ ប្រទេសវៀតណាម ត្រូវបាននាំខ្លួនទៅអធិការដ្ឋាននគរបាល ស្រុកស្ទោង។

ម៉ូតូម៉ាកហុងដាឌ្រីម C125 ពណ៌ខ្មៅ ស្លាកលេខភ្នំពេញ 1CI-5617 ធ្វើដំណើរឆ្លងកាត់ផ្លូវ ពីលិចទៅកើត បើកបរដោយឈ្មោះ វី ឆាយ ភេទប្រុស អាយុ៤៨ឆ្នាំ នៅភូមិសំបួរត្បូង ឃុំម្សាក្រង ស្រុកស្ទោង ខេត្តកំពង់ធំ មុខរបរកសិករ បានស្លាប់តាមផ្លូវ ពេលបញ្ជូនទៅមន្ទីរពេទ្យខេត្តកំពង់ធំ (ពាក់មួកសុវត្ថិភាព)។

មូលហេតុបឋមបង្ក៖ ខាងម៉ូតូ បើកឆ្លងកាត់ផ្លូវ ខ្ជីខ្ជាខ្វះការប្រុងប្រយ័ត្ន ចំណែកអ្នកបើករថយន្ត មានល្បឿនលឿន។

ក្រោយកើតហេតុ សមត្ថកិច្ច បានចុះវាស់វែង និងយកវត្ថុតាងរក្សាទុក នៅអធិការដ្ឋាននគរបាលស្រុកស្ទោង រីឯសព បានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី៕