ភ្នំពេញៈ ជនសង្ស័យ ៣នាក់ត្រូវកម្លាំងសមត្ថកិច្ចបានធ្វើការឃាត់ខ្លួន និងបានឆែកឆេររកឃើញថ្នាំញៀន ២កញ្ចប់នៅនឹងខ្លួន កាលពីវេលាម៉ោង១២និង១៥នាទីរំលងអាធ្រាត្រ ឈានចូលថ្ងៃទី២៧ ខែកក្កដា ឆ្នាំ២០១៦ ដែលនៅតាមបណ្តោយផ្លូវជាតិលេខ៥ ចំណុចមុខសួនឃ្លាំងសាំងសូគីម៉ិច ក្រុម៤ ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
ជនសង្ស័យដែលត្រូវបានសមត្ថកិច្ចឃាត់ខ្លួន ទី១ ឈ្មោះ សុខ ជា ភេទប្រុស អាយុ ៣១ឆ្នាំ មុខរបរ មិនពិតប្រាកដ មានទីលំនៅភូមិព្រែកថ្មី ឃុំព្រែកថ្មី ស្រុកកៀនស្វាយ ខេត្តកណ្តាល, ទី២ ឈ្មោះ ប៊ុន ស៊ីថា ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់ទីនៅភូមិទ្រា សង្កាត់ស្ទឹងមានជ័យ ខណ្ឌមានជ័យ និងទី៣ ឈ្មោះ ជ័យ សុវណ្ណាល់ ភេទប្រុស អាយុ ២៤ឆ្នាំ មុខរបរ មិនពិតប្រាកដ ស្នាក់នៅផ្ទះលេខ៣៤០ ផ្លូវលំ ភូមិអូបែកក្អម សង្កាត់ទឹកថ្លា ខណ្ឌសែនសុខ និងបានដកហូតម៉ូតូ មួយគ្រឿង ម៉ាកសង់កូរ៉េ គ្មានស្លាកលេខ ។
ប្រភពព័ត៌មានពីសមត្ថកិច្ចបានឲ្យដឹងថា នៅមុនពេលកើតហេតុ កម្លាំងសមត្ថកិច្ចយើងបាននឹងកំពុងចុះអនុវត្តច្បាប់ចរាចរផ្លូវគោក និងអាវុធជាតិផ្ទុះ ក៏ប្រទះឃើញជនសង្ស័យទាំង ៣នាក់ជិះម៉ូតូ ដោយមានការសង្ស័យ ទើបកម្លាំងសមត្ថកិច្ចយើងបានធ្វើការឃាត់ និងឆែកឆេរបានរកឃើញនៅម្សៅក្រាមពណ៌(ស)ថ្លា ២កញ្ចប់ ជាប្រភេទ ម៉ាទឹកកក ហើយកម្លាំងសមត្ថកិច្ចយើងបានឃាត់ខ្លួនយកមកប៉ុស្តិ៍នគរបាលរដ្ឋបាលឫស្សីកែវ ដើម្បីធ្វើការសាកសួរ។
បច្ចុប្បន្ន ជនសង្ស័យទាំង៣នាក់ខាងលើ រួមនឹងវត្ថុតាងត្រូវបានសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋានខណ្ឌឫស្សីកែវ ដើម្បីបញ្ជូនទៅកាន់តុលាការចាត់ការបន្តតាមនិតិវិធីច្បាប់៕
មតិយោបល់