សៀមរាប: យោងតាមផេកការិយាល័យផ្សព្វផ្សាយតាមបណ្ដាញសង្គម បានឲ្យដឹងថា នាវេលាម៉ោង១៥ និង ៣០នាទីថ្ងៃទី ២៤ ខែ ធ្នូ ឆ្នាំ ២០១៩ កម្លាំងការិយាល័យស៊ើបអង្កេត និងអនុវត្តនីតិវិធី បានទទួលជនបរទេសម្នាក់ ពីអធិការដ្ឋាននគរបាលក្រុងសៀមរាប ពាក់ព័ន្ធនឹងករណីលួចស្នាក់នៅខុសច្បាប់ (គ្មានលិខិតឆ្លងដែនជាប់ខ្លួន) និងប្រើប្រាស់ដោយខុសច្បាប់នូវសារធាតុញៀន។

ជនបរទេសរូបនេះ ឈ្មោះ ESPELAND BARD GARCIA DE PRESNO ភេទប្រុស កើតថ្ងៃទី ២៥-០៩-១៩៦៩ ជនជាតិ ណ័រវេ កាន់លិខិតឆ្លងដែនលេខ ៣៣៥៤៦៥៤៩ ជាភ្ញៀវទេសចរណ៍ ចូលមកព្រះរាជាណាចក្រកម្ពុជា កាលពីថ្ងៃទី ២៩-១១-២០១៩ តាមច្រកទ្វារព្រំដែនអន្តរជាតិប៉ោយប៉ែត ស្នាក់នៅតាមទីសាធារណ:នានា ក្នុងក្រុងសៀមរាប។

ជនបរទេសរូបនេះ ត្រូវបានកម្លាំងអធិការដ្ឋាននគរបាលក្រុងសៀមរាប នាំខ្លួនពីចំណុចវត្តពោធិអារញ្ញសោមនស្ស (ហៅវត្តចក) ក្នុងពេលដែលជនបរទេសរូបនេះ កំពុងមានអាការរវើរវាយ ដេកនៅលើបង់ក្នុងវត្ត និងមានកញ្ឆាគ្រាម០១កញ្ចប់ជាប់នឹងខ្លួន លិខិតឆ្លងដែន មិនដឹងទុកនៅកន្លែងណា។

បច្ចុប្បន្ន ជនបរទេសនេះ ត្រូវបានចាត់បញ្ជូនទៅស្នាក់ការត្រៀម បណ្តេញចេញប្រចាំខេត្តសៀមរាប ចាត់ការបន្តតាមនីតិវិធី៕