ព័ត៌មានជាតិ

ឃាត់ខ្លួន​ជនជាតិ​ចិន​ម្នាក់ ព្យាយាម​ដឹក​ស្ត្រី​រងគ្រោះ​ម្នាក់​គេចចេញពីផ្ទះសំណាក់តាមរថយន្ត

​ភ្នំពេញ: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា សមត្ថកិច្ច​នគរបាល​ខណ្ឌ​ជ្រោយចង្វារ បាន​បង្ក្រាប​ឃាត់ខ្លួន​ជនជាតិ​ចិនតៃវ៉ាន់​ម្នាក់ ពាក់ព័ន្ធ​ករណី​ព្យាយាម​ដឹក​ស្ត្រី​រងគ្រោះ​ម្នាក់​គេចខ្លួន​ចេញពីផ្ទះ​សំណាក់ ដោយ​មិនដឹង​មូលហេតុ​ច្បាស់លាស់ ។​

​សេចក្តីរាយការណ៍​ បាន​ឲ្យ​ដឹងថា នៅវេលា​ម៉ោង​២០​និង​០០​នាទី ថ្ងៃទី​១៦ ខែមករា ឆ្នាំ​២០២០ នៅ​ចំណុច​ផ្ទះសំណាក់​យីហោ «​មហាលាភ​» ឋិត​តាម​បណ្តោយ​ផ្លូវជាតិ​លេខ​៦A មាន​ជនជាតិ​ចិន​(​តៃវ៉ាន់​)​ម្នាក់​ឈ្មោះ រ៉ូ ប៉រ​ឆេន ភេទ​ប្រុស អាយុ​៥៤​ឆ្នាំ បាន​ជួល​បន្ទប់​ផ្ទះសំណាក់​លេខ​២១៣ ។ មួយសន្ទុះ​ក្រោយមក​អ្នកបម្រើ​ការងារ​ក្នុងផ្ទះ​សំណាក់​នោះ​ ក៏​បានឃើញ​ជនជាតិ​នោះបាន​បី​នារី​រងគ្រោះ​ម្នាក់​ដាក់ចូល​ឃ្លុប​ឡាន ។ ឃើញ​ដូច​នោះ​នាង​ក៏បាន​សួរនាំ​ជនសង្ស័យ និង​បាន​ផ្តល់ព័ត៌មាន​ជូន​សមត្ថកិច្ច ស្របពេលនោះ​ជនសង្ស័យ​ ព្យាយាម​បើករថយន្ត​ពាក់​ផ្លាក​លេខ​ភ្នំពេញ 2AV-8491) គេច​ពី​កន្លែងកើតហេតុ ។​

​ប្រភព​បន្តថា លុះ​មកដល់​ត្រង់ចំណុច​ក្រោយ​ភោជនីយដ្ឋាន​បឹង​មាស (​ផ្លូវ​បេតុង​នាង​មច្ឆារ​) ត្រូវបាន​សមត្ថកិច្ច​ឃាត់ខ្លួន​ជនសង្ស័យ​បាន និង​បញ្ជូន​នារី​ជនរងគ្រោះ​ ដែល​មិនទាន់​ស្គាល់​អត្តសញ្ញាណ​ទៅ​មន្ទី​ពេទ្យ​កាល់ម៉ែត ចំណែក​ជនសង្ស័យ​បញ្ជូនបន្ត​មក​អធិការដ្ឋាន​នគរបាល​ខណ្ឌ​ជ្រោយចង្វារ ដើម្បី​ធ្វើការ​សាកសួរ ចាត់ការ​ទៅតាម​នីតិវិធី​ច្បាប់៕

មតិយោបល់