ស្វាយរៀង: កាលពីវេលាម៉ោង ៦ និង ៤០នាទី ថ្ងៃទី២៦ ខែមករា ឆ្នាំ២០២០ មានករណីគ្រោះថ្នាក់ចរាចរណ៍មួយកើតឡើងរវាង ម៉ូតូ និង ម៉ូតូ លើកំណាត់ផ្លូវជាតិលេខ៣១៤D ស្ថិតភូមិទួលត្របែក ឃុំប្រសូត្រ ស្រុកស្វាយទាប បណ្តាលឲ្យមនុស្ស២នាក់របួសធ្ងន់ស្រាល។

ដំណើររឿង៖ មុនពេលកើតហេតុ គេឃើញមានម៉ូតូមួយគ្រឿងម៉ាក ហុងដាសេ១២៥ ស៊េរីឆ្នាំ២០២០ ពណ៌ខ្មៅ ពាក់ផ្លាកលេខ ស្វាយរៀង 1O-7446 បើកបរដោយឈ្មោះ ប៉ែន សារិន ភេទប្រុស អាយុ ២៩ ឆ្នាំ មុខរបរកសិករ រស់នៅភូមិប្រសូត្រ១ ឃុំកណ្តៀងរាយ ស្រុកស្វាយទាប​ (របួសធ្ងន់) ទិសដៅពីជើងទៅត្បូងក្នុងល្បឿនលឿន ខណ:មកដល់ចំណុចខាងលើ បានបុកជាមួយម៉ូតូម៉ាក ហុងដាឌ្រីម សេ១២៥ ស៊េរីឆ្នាំ២០១៤ ពណ៌ខ្មៅ ពាក់ផ្លាកលេខ ស្វាយរៀង ១D ៧៤៩៥ បើកបរដោយឈ្មោះ ប្រុស ខេង ភេទប្រុស អាយុ ២២ ឆ្នាំ មុខរបរកម្មកររោងចក្រ រស់នៅភូមិព្រៃទួល ឃុំប្រសូត្រ ស្រុកស្វាយទាប ខេត្តស្វាយរៀង​(របួសស្រាល) ទិសដៅបញ្ច្រាស់គ្នា រួមដំណើរដោយឈ្មោះ រឹម ប៉េងភេទប្រុស អាយុ ៤៨ ឆ្នាំ មុខរបរកសិករ រស់នៅភូមិ/ឃុំជាមួយគ្នា (របួសស្រាល)។

ក្រោយកើតហេតុ សមត្ថកិច្ចបានចុះដល់ទីតាំង ធ្វើការវាស់វែងយកវត្ថុតាងទៅរក្សាទុកនៅប៉ុស្តិ៍រដ្ឋបាលឃុំប្រសូត្រ ដើម្បីដោះស្រាយគ្នាពេលក្រោយ ចំណែកអ្នករបួសបញ្ជូនទៅព្យាបាលនៅមន្ទីរ៕