ផ្ទះ ព័ត៌មានជាតិ ព្រឹកនេះតែងតា...

ព្រឹកនេះតែងតាំងស្នងការខេត្តកណ្ដាលថ្មីហើយ…

0

កណ្តាល: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា លោក​ឧ​ត្ត​ម​សេនីយ៍​ត្រី ឈឿន សុចិ​ត្ត អត្តលេខ ៥៣៨៤៩ ស្នងការរង នៃ​ស្នងការដ្ឋាន​នគរបាល​ខេត្តកណ្តាល នៅ​ព្រឹក​ថ្ងៃទី​៣០ ខែមករា ឆ្នាំ​២០២០ ត្រូវបាន​ឡើងកាន់​ជា ស្នងការ ជំនួស​តំណែង​លោក​ឧ​ត្ត​ម​សេនីយ៍​ទោ អ៊ា​វ ចម្រើន អត្តលេខ ០៣៦៤១ អ​តី​តស្នងការ នៃ​ស្នងការដ្ឋាន​នគរបាល​ខេត្តកណ្តាល ទៅ​បម្រើការ​ជា​នាយករង​មន្ទីរ​ប្រឆាំង​គ្រឿងញៀន ។​

​ពិធី​ប្រកាស​ផ្ទេរ​ភារកិច្ច និង​តែងតាំង​មុខតំណែង​ស្នងការ​នៃ​ស្នងការដ្ឋាន​នគរបាល​ខេត្តកណ្តាល បាន​ប្រារព្វ​ធ្វើឡើង​នៅ​សាលាខេត្ត ក្រោម​អធិបតីភាព​ឯកឧត្តម នាយ​ឧ​ត្ត​ម​សេនីយ៍ សន្តិ​បណ្ឌិត នេ​ត សាវឿន អគ្គស្នងការ​នគរបាល​ជាតិ​, ឯកឧត្តម ម៉ៅ ភិ​រុណ អភិបាល នៃ​គណ:​អភិបាលខេត្តកណ្តាល និង​មានការ​ចូលរួម​ថ្នាក់ដឹកនាំ​កម្លាំងប្រដាប់អាវុធ ប្រធាន​អនុប្រធាន​មន្ទីរ តាម​មន្ទីរ​ជុំវិញ​ខេត្ត ប្រធាន​-​អនុប្រធាន​សាខាគយ និង​រដ្ឋាករ សាខា​ពន្ធដារ អភិបាលស្រុក អធិការ​ស្រុក ជាច្រើន​នាក់​ផងដែរ​។​

​លោក​ឧ​ត្ត​ម​សេនីយ៍​ទោ នួន កក្កដា អនុប្រធាននាយកដ្ឋាន​បុគ្គលិក នៃ​អគ្គស្នងការដ្ឋាន​នគរ​បាល​ជាតិ បាន​ឡើង​អាន​ប្រកាស​ស្តីពី​៖ ការផ្ទេរ​ភារកិច្ច និង​តែងតាំង​មុខតំណែង​មន្ត្រី​នគរបាលជាតិ ដែល​ចេញ​និង​ចុះហត្ថលេខា​ដោយ​សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ចុះ​ថ្ងៃទី​២៣ ខែមករា ឆ្នាំ​២០២០ និង​យោងតាម​សំណើ​របស់​អគ្គស្នងការ​នៃ​អគ្គស្នងការដ្ឋាន​ន​ត​របាល​ជាតិ បានសម្រេច​៖
​ប្រការ​១: ត្រូវបាន​ផ្ទេរ​ភារកិច្ច និង​តែងតាំង​មុខតំណែង​មន្ត្រី​នគរបាលជាតិ ដូច​មានឈ្មោះ​ខាងក្រោម ៖ ១.​លោក​ឧ​ត្ត​ម​សេនីយ៍​ទោ អ៊ា​វ ចម្រើន អត្តលេខ ០៣៦៤១ ពី​ស្នងការ នៃ​ស្នងការដ្ឋាន​នគរបាល ខេត្តកណ្តាល ជា​នាយករង មន្ទីរ​ប្រឆាំង​គ្រឿងញៀន ។​
ប្រការ២.​លោក​ឧ​ត្ត​ម​សេនីយ៍​ត្រី ឈឿន សុចិ​ត្ត អត្តលេខ ៥៣៨៤៩ ស្នងការរង ជា​ស្នងការ នៃ​ស្នងការដ្ឋាន នគរបាល​ខេត្តកណ្តាល ។​
​លោក​ឧ​ត្ត​ម​សេនីយ៍​ត្រី ឈឿន សុចិ​ត្ត ស្នងការ នៃ​ស្នងការដ្ឋាន​នគរបាល​ខេត្តកណ្តាល ដែល​ទើប​ឡើងកាន់តំណែង បាន​ឡើង​ប្តេជ្ញាចិត្ត​ចំពោះ​គណ:អធិបតី​យ៉ាង​ដូច្នេះ​ថា​៖ ថ្ងៃនេះ​គឺជា​ថ្ងៃមួយ​ដ៏​ឧត្តុង្គឧត្តម​ថ្លៃថ្លា​បំផុត​សម្រាប់​រូបខ្ញុំ ក៏ដូចជា​មន្ត្រីនគរបាល​នៃ​ស្នងការដ្ឋាន​នគរបាល​ខេត្តកណ្តាល មាន​កិត្តិយស​បានទទួល​នូវ​ការប្រកាស​ផ្ទេរ​ភារកិច្ច និង​តែងតាំង​មុខតំណែង​នាឱកាស​នេះ​។ ដើម្បី​សម្តែង​នូវ​ទឹកចិត្ត​ដ៏​ស្មោះស្ម័គ្រ​ភក្តី ចំពោះ​ថ្នាក់ដឹកនាំ​គ្រប់​ជាន់ថ្នាក់ ខ្ញុំបាទ​សូម​ធ្វើការ​សន្យា​ដោយ​ការទទួលខុសត្រូវ និង​ប្តេជ្ញាចិត្ត ដូចតទៅ ៖
-សន្យា​ស្មោះត្រង់​ចំពោះ​ជាតិ សាសនា ព្រះមហាក្សត្រ ។​
-គោរព និង​អនុវត្ត​ដោយស្មោះ​ត្រង់​តាម​កម្មវិធី​នយោបាយ​របស់​រាជរដ្ឋាភិបាល​នៃ​ព្រះរាជាណាចក្រ​កម្ពុជា​ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ​ដឹកនាំ ។​
-យក​អស់​កម្លាំងកាយ​ចិត្ត គំនិត ប្រាជ្ញា​ដើម្បី​បំរើ​ផលប្រយោជន៍​ប្រជារាស្ត្រ និង​មិន​ធ្វើ​អ្វីដែល​នាំ​ឲ្យ​ប៉ះពាល់​ប្រយោជន៍​របស់​ប្រជារាស្ត្រ​ឡើយ ។​
-គោរព និង​ប្រតិបត្តិ​យ៉ាង​ម៉ឺងម៉ាត់ និង​ដោយ​សច្ច:​យុត្តិធម៌​ចំពោះ​ច្បាប់ បទ​ប្ប​ញ្ញ​តិ​​និង​បទបញ្ជា​ផ្សេងៗ របស់​ថ្នាក់ដឹកនាំ​គ្រប់​ជាន់ថ្នាក់ ។​
-អនុវត្តន៍​យ៉ាង​ម៉ឺងម៉ាត់​នូវ​វិន័យ​លេខ ០០៦ របស់​កងកម្លាំង​នគរបាលជាតិ ។​
-រក្សា​សាមគ្គីភាព​ផ្ទៃក្នុង និង​អង្គភាព​ពាក់ព័ន្ធ​ផ្សេងទៀត​ឲ្យ​បានល្អ​ប្រសើរ ។​
-ជាទី​បញ្ចប់​ខ្ញុំបាទ​សូម​ថ្លែងអំណរគុណ​យ៉ាង​ជ្រាលជ្រៅ​បំផុត ចំពោះ​លោក​គណ:អធិបតី ភ្ញៀវកិត្តិយស សមាជិក សមាជិកា ក្នុង​អង្គពិធី​ទាំងមូល​ដែល​បាន​ចំណាយ​ពេលវេលា​ដ៏​មាន​តំលៃ​ដើម្បី​មក​ចូលរួម​ក្នុងឱកាស​នេះ​។​

​លោក​ឧ​ត្ត​ម​សេនីយ៍​ត្រី​បន្តថា ជាថ្មី​ម្តងទៀត ខ្ញុំបាទ​សូម​ថ្លែងអំណរគុណ និង​សូម​គោរព​ជូនពរ លោក​គណ:អធិបតី ភ្ញៀវកិត្តិយស​ទាំងអស់​ក្នុង​អង្គពិធី​ទាំងមូល សូម​ទទួលបាន​នូវ​សុខភាព​មាំមួន ប្រាជ្ញា​ឈ្លាសវៃ និង​ជោគជ័យ​គ្រប់​ភារកិច្ច ។​
​ឯកឧត្តម ម៉ៅ ភិ​រុណ អភិបាល នៃ​គណ:​អភិបាលខេត្ត​កណ្តាល បានផ្តល់​ជាម​តិ និង​ផ្តាំផ្ញើ​ថា សូម​សរ​សើរ​ដល់​លោក​ឧ​ត្ត​ម​សេនីយ៍​ត្រី ឈឿន សុចិ​ត្ត ត្រូវបាន​ថ្នាក់ដឹកនាំ​អគ្គស្នងការ​នគរបាល​ជាតិ មាន​ទំនុកចិត្ត ផ្តល់​តំណែង​ជា​ស្នងការ នៃ​ស្នងការដ្ឋាន​នគរបាល​ខេត្តកណ្តាល និង​សូម​ឲ្យ​លោក​ប្រឹងប្រែង​យក​អស់កម្លាំង​កាយ​ចិត្ត សមត្ថភាព ដឹកនាំ​កម្លាំង​ចូលរួម​ការការពារ សន្តិសុខ សណ្តាប់ធ្នាប់ ជូន​ប្រជាពលរដ្ឋ​ទូទាំង​ខេត្ត​។​

​ឯកឧត្តម នាយ​ឧ​ត្ត​ម​សេនីយ៍ សន្តិ​បណ្ឌិត នេ​ត សាវឿន អគ្គស្នងការ​នគរបាល​ជាតិ បាន​មានប្រសាសន៍​លើកឡើង​ពី​តំណែង​របស់លោក​ឧ​ត្ត​ម​សេនីយ៍ អ៊ា​វ ចម្រើន កាន់តំណែង​ជា​ស្នងការ​យូរ​ជាងគេ​មាន​រយ:ពេល​១៥​ឆ្នាំ ដែល​អាច​និយាយបានថា នឹង​អាចមាន​ចំណុច​ល្អ ចំណុច​ខ្វះខាត អាច​នឹង​កើតមាន​ខ្លះ​។ ឯកឧត្តម នាយ​ឧ​ត្ត​ម​សេនីយ៍​អគ្គស្នងការ​បន្តថា ចំពោះ​ការតាំង​ចិត្ត ឬ​ការ​ប្តេ​ជា​ចិត្ត​ដោយ​លោក​ឧ​ត្ត​ម​សេនីយ៍​ត្រី ឈឿន សុចិ​ត្ត ស្នង​ការឡើង​ថ្មី សូម​ឲ្យ​ធ្វើការ​ជោគជ័យ ហើយ​ការសម្រេចចិត្ត​របស់លោក​ស្នងការ​ថ្មី ឯកឧត្តម នាយ​ឧ​ត្ត​ម​សេនីយ៍​ជឿ​ជា​បណ្តោះអាសន្ន​សិន និង​សូម​ឲ្យ​ភ្ញៀវកិត្តិយស​នៅក្នុង​កម្មវិធី​ជួយ​ធ្វើជា​សាក្សី ពិសេស​សូម​ឲ្យ​កម្លាំង​នគរបាល​ខេត្ត​ទាំងអស់​ខិតខំ​បំពេញការងារ ដោយ​សហការ សាមគ្គី​ផ្ទៃក្នុង​។​

​ឯកឧត្តម នាយ​ឧ​ត្ត​ម​សេនីយ៍ សន្តិ​បណ្ឌិត​អគ្គស្នងការ​នគរបាល​ជាតិ ក៏បាន​មានប្រសាសន៍​លើកឡើង​ពី​ការដឹកនាំ​របស់​ឯកឧត្តម ម៉ៅ ភិ​រុណ អភិបាល នៃ​គណ:​អភិបាលខេត្ត​កណ្តាល ដឹកនាំ​ការងារ​ទទួលបាន​ជោគជ័យ​ជូន​ប្រជាពលរដ្ឋ ថ្នាក់ដឹកនាំ អស់​រយ:ពេល​ជាច្រើន​ឆ្នាំ និង​ជា​រនាំង​ការពារ​រាជធានី​ភ្នំពេញ ជា​បេះដូង នៃ​ព្រះរាជាណាចក្រ​កម្ពុជា មាន​ស្ថេរភាព សន្តិភាព​ពេញលេញ ៕

មតិយោបល់