ភ្នំពេញ: មនុស្សប្រុសស្រីចំនួន៧០នាក់ (ក្នុងនោះមានទាំងបុគ្គលិក១៨នាក់ ) រួមទាំងវត្ថុតាងថ្នាំញៀន និងឧបករណ៍ពាក់ព័ន្ធ ត្រូវបាននគរបាល ឃាត់ខ្លួននាំទៅស្នងការដ្ឋាននគរបាលរាជធានីភ្នំពេញបណ្ដោះអាសន្ន ដើម្បីរង់ចាំជំនាញ ធ្វើតេស្តពិនិត្យទឹកនោម រកសារធាតុញៀន និងបែងចែកតាមប្រភេទ បទល្មើស ដែលពាក់ព័ន្ធ ដើម្បីកសាងសុំណំរឿង បន្តចាត់ការតាមនីតិវិធី។

នេះជាលទ្ធផលនៃការបង្ក្រាប ដោយកម្លាំងនគរបាលព្រហ្មទណ្ឌកម្រិតស្រាល នៃសង្នការដ្ឋាននគរបាលរាជធានីភ្នំពេញ សហការជាមួយកម្លាំងអន្តរាគមន៍ពិសេស នៃស្នងការដ្ឋាននគរបាលរាជធានីភ្នំពេញ ដឹកនាំដោយផ្ទាល់ពីឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បើកប្រតិបត្តិការ ទ្រង់ទ្រាយធំ ឡោមព័ទ្ធទីតាំង មណ្ឌលកម្សាន្ត “ផ្លាយ FLY” ដែលសង្ស័យពាក់ព័ន្ធគ្រឿងញៀន (ថ្នាំក្រវី) ដោយឆ្មក់ចូលបង្ក្រាប ឃាត់ខ្លួនបានមនុស្សប្រុសស្រីជាង៧០នាក់ ដកហូតសារធាតុញៀន ជាច្រើនកញ្ចប់ រួមទាំងឧបករណ៍ សម្រាប់ប្រើប្រាស់ មួយចំនួន។

កិច្ចប្រតិបត្តិការ ចុះបង្ក្រាបទីតាំងខាងលើ ធ្វើឡើង កាលពីវេលាម៉ោង២យប់រំលងអធ្រាត្រ ឈានចូលថ្ងៃទី០៩ ខែកុម្ភ: ឆ្នាំ២០២០នេះ ក្នុងមណ្ឌលកម្សាន្ត “ផ្លាយ FLY” ស្ថិតនៅតាបណ្ដោយផ្លូវជាតិលេខ៦ ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។

តាមប្រព័ត៌មានពីនគរបាល បានឲ្យដឹងថា មុនឈានដល់ការចុះប្រតិបត្តិការនេះ កម្លាំងសមត្ថកិច្ចជំនាញ បានធ្វើការស្រាវជ្រាវ ស៊ើបអង្កេតបានដឹងច្បាស់ថា ទីតាំងមណ្ឌលកម្សាន្ត “ផ្លាយ FLY” ស្ថិតនៅតាបណ្ដោយផ្លូវជាតិលេខ៦ សង្កាត់/ខណ្ឌជ្រោយចង្វារ មានប្រើប្រាស់ថ្នាំក្រវី និងសារធាតុញៀន តាមបន្ទប់នីមួយៗ (មានសារធាតុញៀន គ្រាប់ មានម៉្សៅ -ល-) និងសមត្ថកិច្ច បានធ្វើការឃាត់ខ្លួនមនុស្សសរុប ចំនួន៧០នាក់ រួមមានបុគ្គលិកប្រុសស្រី ចំនួន១៨នាក់ ភ្ញៀវប្រុសចំនួន៣៤នាក់ និងភ្ញៀវស្រីចំនួន១៨នាក់ រួមទាំងសារធាតុញៀនជាច្រើនកញ្ចប់ ឧបករណ៍សម្រាប់ប្រើប្រាស់ មួយចំនួន។

ជាមួយគ្នានោះដែរ សមត្ថកិច្ចក៏បានដកហូត ម៉ូតូ ៣៤គ្រឿង និងរថយន្ត ៧គ្រឿង យកមករក្សាទុកបណ្ដោះអាសន្ន នៅស្នងការដ្ឋាននគរបាលរាជធានីភ្នំពេញផងដែរ៕