កណ្ដាលៈ មានការភ្ញាក់ផ្អើលមួយបានកើតឡើងកាលពីវេលាម៉ោង១១និង០៥នាទីថ្ងៃទី៣០ ខែកក្កដា ឆ្នាំ២០១៦ ចំណុចភូមិក្រាំងរលួស ឃុំរលាំងកែន ស្រុកកណ្ដាលស្ទឹង ខេត្តកណ្ដាល បន្ទាប់ពីបុរសម្នាក់បានឡើងដើមស្វាយ ត្រូវខ្សែភ្លើងឆក់ស្លាប់។

សមត្ថកិច្ចបានឲ្យដឹងថា ជនរងគ្រោះឈ្មោះ ស៊ុង ឌីសត្យា ភេទប្រុសអាយុ៣០ឆ្នាំ មុខរបរៈកម្មករអគ្គិសនី រស់នៅភូមិត្រពាំងដំរី ឃុំសែនដី ស្រុកសំរោងទង ខេត្តកំពង់ស្ពឺ។

ប្រភពពីសមត្ថកិច្ចបានដឹងថា មុនពេលកើតហេតុជនរងគ្រោះបានយកកាំបិតផ្គាក់ឡើងកាប់មែកស្វាយ ហើយមែកស្វាយបានធ្លាក់សង្កត់លើខ្សែភ្លើង (ខ្សែកាប) មកប៉ះជនរងគ្រោះ បណ្ដាលឲឆក់ស្លាប់នៅលើចុងស្វាយតែម្ដង។

ក្រោយកើតហេតុសមត្ថកិច្ចជំនាញសហការជាមួយអាជ្ញាធរមូលដ្ឋានឃុំរលាំងកែន ចុះពិនិត្យសាកសពឃើញថា ជនរងគ្រោះពិតជាស្លាប់ដោយសារឆក់ខ្សែភ្លើងប្រាកដមែន។ ក្រោយពិនិត្យចប់សាកសពបានប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី៕