បាត់ដំបងៈ នៅថ្ងៃទី១៧ ខែកុម្ភៈ ឆ្នាំ២០២០ វេលាម៉ោង០២និង៣០នាទីទាបភ្លឺ នៅក្រុមទី៣ ភូមិកំប្រង់ ឃុំតាក្រី ស្រុកកំរៀង មានករណីលួចមានស្ថានទម្ងន់ទោសមួយកើតឡើងប្រព្រឹត្តដោយជនសង្ស័យមិនស្គាល់អត្តសញ្ញាណ បានធ្វើសកម្មភាពដោះវីសជញ្ជាំងផ្ទះលួចយកទូរស័ព្ទម៉ាកសាំសុងពណ៌ខ្មៅមួយគ្រឿង ពណ៌ផ្កាឈូកមួយគ្រឿង ម៉ាកmobiiStar(ម៉ូប៊ីស្តា) ពណ៌ខ្មៅមួយគ្រឿង ស្ពីឃឺពណ៌ខ្មៅ ខៀវមួយគ្រឿង របស់ជនរងគ្រោះឈ្មោះ ញ៉ក់ ខាន់ ហៅ ពយ ភេទប្រុស អាយុ ៣៣ឆ្នាំ រស់នៅភូមិកំប្រង់ ឃុំតាក្រី ស្រុកកំរៀង មានមុខរបរ លក់ដូរ។
ក្រោយពីទទួលបណ្តឹងពីជនរងគ្រោះ កម្លាំងផ្នែកជំនាញ នៃអធិការដ្ឋាននគរបាលស្រុកកំរៀង សហការជាមួយប៉ុស្តិ៍នគរបាលរដ្ឋបាលតាក្រី និងប៉ុស្តិបឹងរាំង បានធ្វើការស្រាវជ្រាវរហូតដល់ម៉ោង ២និង៥៥នាទី រកឃើញជនសង្ស័យម្នាក់ឈ្មោះ មី ធី ភេទប្រុស អាយុ ៣៤ឆ្នាំ រស់នៅភូមិអូរដាលើ ឃុំបឹងរាំង ស្រុកកំរៀង មុខរបរមិនពិតប្រាកដ ។ បន្ទាប់ពីនាំឈ្មោះខាងលើរួមនឹងវត្ថុតាង មកសាកសួរនៅអធិការដ្ឋាននគរបាលស្រុកកំរៀង ជនសង្ស័យបានឆ្លើយសារភាពថា ខ្លួនពិតជាបានដោះវីសជញ្ជាំងផ្ទះចូលលួចយកសម្ភារៈរបស់ជនរងគ្រោះពិតប្រាកដមែន។
ករណីនេះ ត្រូវបានសមត្ថកិច្ចជំនាញរៀបចំសំណុំរឿងបញ្ជូនទៅសាលាដំបូងខេត្តបាត់ដំបង ដើម្បីចាត់ការបន្តតាមនីតិវិធី៕
មតិយោបល់