បន្ទាយមានជ័យៈ ជនសង្ស័យកាច់សោ.កម៉ូតូម្នាក់ ត្រូវបានសមត្ថកិច្ចស្រុកស្វាយចេក ស្ទាក់ចាប់ប្រផាប់ ប្រភីង បន្ទាប់ពីធ្វើសកម្មភាព លួចម៉ូតូអ្នកដទៃពីស្រុកថ្មពួក ឆ្លងកាត់ស្រុកស្វាយចេក កាលពីចុងសប្តាហ៍កន្លងទៅ នៅលើកំណាត់ផ្លូវជាតិលេខ៥៦A ស្ថិតក្នុងភូមិសាស្ត្រឃុំរលួស ស្រុកស្វាយចេក ខេត្តបន្ទាយមានជ័យ។
លោកវរសេនីយ៍ត្រី ជា ស្លូញ អធិការនគរបាលស្រុកស្វាយចេក បានឲ្យដឹងថា ជនសង្ស័យខាងលើមានឈ្មោះ វឹក វី ភេទប្រុស អាយុ ២៤ឆ្នាំ រស់នៅភូមិថ្មីលិច ឃុំភូមិថ្មី ស្រុកថ្មពួក ហើយការឃាត់ខ្លួននេះ ធ្វើឡើង បន្ទាប់ទទួលបានការសហការណ៍តាមទូរស័ព្ទពីលោកអធិការនគរបាលស្រុកថ្មពួក ថា មានករណីលួចម៉ូតូម៉ាកស្កុតពី ពណ៌ស របស់ គ្រូបង្រៀនម្នាក់ឈ្មោះ ទុយ ប៊ុនទាប់ ភេទប្រុស អាយុ២៩ឆ្នាំ រស់នៅភូមិផ្សារថ្មី ឃុំគំរូ ស្រុកថ្មពួក នៅសាលាអនុវិទ្យាល័យឃុំភូមិថ្មី ខណៈដែលគ្រូបង្រៀនដាក់បញ្ឈរម៉ូតូទុកចោលមិនដកសោចេញហើយចូលក្នុងអាគារបណ្ណាល័យ។
លោកបញ្ជាក់ថា ក្រោយពីទទួលព័ត៌មានភ្លាម លោកបានដាក់ពង្រាយកម្លាំងនគរបាល តាមផ្លូវជាតិលេខ៥៦A ក្នុងភូមិសាស្ត្រ ស្រុក ស្វាយចេក ក្រោយមកសមត្ថកិច្ចឃើញមុខសញ្ញាជនសង្ស័យជិះម៉ូតូដែលគេលួចនោះ ឆ្លងកាត់ចំណុចត្រួតពិនិត្យកម្លាំងនគរបាល។
សមត្ថកិច្ចក៏បានចេញស្ទាក់ ហើយជិះម៉ូតូប្រដេញចាប់បាននៅពេលជនសង្ស័យព្យាយាមបើករត់គេចចូលវាលស្រែ និងចំការដំឡូង។ បច្ចុប្បន្ន ជនសង្ស័យត្រូវបាននគរបាលស្រុកស្វាយចេក ចាប់ប្រគល់ឱ្យនគរបាលស្រុកថ្មពួក ដើម្បីចាត់ការតាមផ្លូវច្បាប់ ៕
មតិយោបល់