ពោធិ៍សាត់: យោងតាមផេក ការិយាល័យផ្សព្វផ្សាយតាមបណ្ដាញសង្គម បានឲ្យដឹងថា ភ្លើងសញ្ញាចរាចរណ៍ (ភ្លើងស្តុប) នៅចំណុចផ្លូវជាតិលេខ៥ ឆ្លងកាត់កំណាត់ផ្លូវបេតុង និងផ្លូវរថភ្លើង ទៅតំបន់អភិវឌ្ឍន៍ភួពុយ «ផ្សារភួពុយ» ក្នុងភូមិពោធិ៍តាគួយ សង្កាត់លលកស ក្រុងពោធិ៍សាត់ ខេត្តពោធិ៍សាត់ បានចាប់ផ្តើមតម្លើង នាថ្ងៃទី២៨ ខែកុម្ភ: ឆ្នាំ២០២០នេះហើយ បន្ទាប់ពីបងប្អូនពុកម៉ែប្រជាពលរដ្ឋ ទន្ទឹងរងចាំជិត១ខែ ដើម្បីសម្រួលការដំណើរ និងកាត់បន្ថយការកកស្ទះចរាចរណ៍ ក៏ដូចជាកាត់បន្ថយអត្រាគ្រោះថ្នាក់ផ្សេងៗ ដែលអាចកើតមានជាយថាហេតុ។

បងប្អូនអាជីវករ បានឲ្យដឹងថា ពីមុនពួកគាត់គ្មានជម្រើស ក៏ចេញមកលក់ដូរពាសវាលពាសកាលតាមមាត់ផ្លូវ ក្នុងទីប្រជុំជនក្រុងពោធិ៍សាត់ ក្បែរនឹងផ្សារថ្មីពោធិ៍សាត់។ បច្ចុប្បន្នដោយបានការយកចិត្តទុកដាក់ គិតគូរពីសុខទុក្ខ និងសុខសុវត្ថិភាព របស់អាជីវករ ក៏ដូចជាប្រជាពលរដ្ឋ ពីសំណាក់ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងារចុះជួយខេត្តពោធិ៍សាត់ លោក ម៉ៅ ធនិន អភិបាលនៃគណ:អភិបាលខេត្ត និងលោកឧកញ៉ា ភួ ពុយ ប្រធានសមាគមស្រូវ និងជាប្រធាសភាពាណិជ្ជកម្ម ខេត្តបាត់ដំបងនោះ បានរៀបចំផ្លាស់ប្តូរទីតាំងថ្មី ឲ្យពួកគាត់ចូលមកលក់ដូរលក្ខណ:ប្រមូលផ្តុំ មានសណ្តាប់ធ្នាប់ល្អ និងធំទូលាយ នៅក្នុងផ្សារភួពុយវិញម្តង។

ខណ:ដែលតាំងអភិវឌ្ឍន៍ភួពុយ «ផ្សារភួពុយ» ទើបនឹងដាក់ឲ្យដំណើរការលក់បណ្ណោះអាសន្ន បានរយ:ពេលជិត ២ខែហើយ ពោលគឺចាប់ពីថ្ងៃទី០៥ ខែមករា ឆ្នាំ២០២០មកម្ល៉េះ បងប្អូនអាជីវករ និងគ្រួសារម៉ូតូឌុប ក៏ដូចជាប្រជាពលរដ្ឋរស់នៅជាប់តំបន់នោះ មានតម្រូវការបន្ថែមជាក់ស្តែងនូវភ្លើងសញ្ញាចរាចរណ៍ (ភ្លើងស្តុប) ពីព្រោះនៅពេលធ្វើដំណើរទៅផ្សារនោះម្តងម្កាល ត្រូវឆ្លងកាត់ផ្លូវជាតិលេខ៥ និងផ្លូវរថភ្លើង ដែលអាចប្រឈមនឹងគ្រោះថ្នាក់ ប្រសិនបើគ្មានភ្លើងសញ្ញាចរាចរណ៍គ្រប់គ្រាន់។ ឆ្លើយតបនឹងតម្រូវការនេះ លោក ភួ ពុយ ក៏ដូចជារដ្ឋបាលខេត្តពោធិ៍សាត់ បានបញ្ជាទិញភ្លើងសញ្ញាចរាចរណ៍ (ភ្លើងស្តុប) ហើយដែលនឹងកំពុងតម្លើង នាថ្ងៃទី២៨ ខែកុម្ភ: ឆ្នាំ២០២០នេះ។

គួរបញ្ជាក់ថា ទីតាំងអភិវឌ្ឍន៍ភួពុយ «ផ្សារភួពុយ» ត្រូវបានលោក ភួ ពុយ សម្រេចផ្តល់ជូនអាជីវករលក់ដូរដោយឥតគិតថ្លៃ ចន្លោះពី៣ ទៅ៥ឆ្នាំ និងបានរៀបចំជាផ្នែកៗ រួមមានផ្សារបន្លែ ផ្សារសាច់ និងតូបលក់ដូរ.ប្រកបដោយផាសុខភាព និងធំទូលាយ៕