កណ្ដាលៈ នគរបាលក្រុងតាខ្មៅចាប់ខ្លួនបុរសម្នាក់ បន្ទាប់ពីយកកាំបិតប័ងតោកាប់ទៅលើបុរសម្នាក់ទៀតរបួសយ៉ាងដំណំ ព្រោះខឹងបុរសរងគ្រោះជិះម៉ូតូកាត់មុខ ។ ករណីនេះបានកើតឡើងនៅវេលាម៉ោង១៩និង៣០នាទី ថ្ងៃទី៨ ខែមីនា ឆ្នាំ២០២០ ត្រង់ចំណុចតាមផ្លូវភូមិក្រពើហារកើត សង្កាត់ព្រែកឬស្សី ក្រុងតាខ្មៅ ខេត្តកណ្តាល។

ជនសង្ស័យឈ្មោះ លាស់ ភារម្យ ភេទប្រុស អាយុ ៣៩ឆ្នាំ ។
ជនរងគ្រោះឈ្មោះ សាយ ឡង់ឌី ភេទប្រុស អាយុ ២៩ឆ្នាំ មានទីលំនៅភូមិក្រពើហារកើត សង្កាត់ព្រែកឬស្សី ក្រុងតាខ្មៅ ខេត្តកណ្តាល ។

ដំណើររឿង៖ កាលពីវេលាកើតហេតុខាងលើ ជនរងគ្រោះបានជិះម៉ូតូតាមបណ្ដោយផ្លូវ លុះមកដល់កន្លែងកើតហេតុ ក៏បើកកាត់មុខជនសង្ស័យ ពេលនោះជនសង្ស័យបានស្រែកដាក់ជនរងគ្រោះថា កាលណាហ្អែងជាប់គុក? ភ្លាមនោះ ជនរងគ្រោះក៏ចុះទៅសួរនាំទើបកើតជាទំនាស់ និងវាយប្រតាយប្រតប់គ្នា បន្ទាប់មកជនសង្ស័យ ក៏រត់ទៅផ្ទះរបស់ខ្លួន យកកាំបិតប៉័ងតោកាប់ទៅលើជនរងគ្រោះ បណ្តាលឲ្យមានរបួសស្នាមត្រង់ជើងខាងស្តាំ ហើយជនសង្ស័យបានបោះកាំបិតប៉័ងតោចោលរកមិនឃើញឡើយ។

ក្រោយកើតហេតុ សមត្ថកិច្ចក៏ចុះអន្តរាគមន៍ឃាត់ខ្លួនជនសង្ស័យបញ្ជូនមកអធិការដ្ឋាន ដើម្បីចាត់ការតាមនីតិវិធីច្បាប់ ៕