សៀមរាបៈ យោងតាមផេកការិយាល័យផ្សព្វផ្សាយតាមបណ្តាញសង្គមបានឲ្យដឹងថា នាវេលាម៉ោង ០២ និង០៥នាទីឈានចូលថ្ងៃទី១៩ ខែមីនា ឆ្នាំ ២០២០ នៅលំនៅដ្ឋាន ភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប ជនបរទេសម្នាក់បានស្លាប់។

ជនរងគ្រោះ ភេទប្រុសកើតថ្ងៃទី១៤-១០-១៩៥៧ ជនជាតិ ម៉ាឡេស៊ី ចូលមកព្រះរាជាណាចក្រកម្ពុជា កាលពីថ្ងៃទី០២ មីនា ២០២០ តាមច្រកព្រលានយន្តហោះអន្តរជាតិសៀមរាប ស្នាក់នៅទីតាំងកើតហេតុខាងលើ (ផ្ទះសង្សារជនជាតិខ្មែរ)។

ផ្អែកតាមការស្រាវជ្រាវរបស់សមត្ថកិច្ចជំនាញ និងលោកវេជ្ជបណ្ឌិត អ៊ិត ឆបឆរ័ត្ន គ្រូពេទ្យអមតុលាការបានសន្និដ្ឋានថា ៖ជនរងគ្រោះស្លាប់ ដោយសារស្ទះសរសៃឈាមបេះដូង។

បច្ចុប្បន្ន សាកសពបញ្ជូន ទៅតម្កល់ទុកបណ្តោះអាសន្ន នៅវត្តទឹកថ្លា រាជធានីភ្នំពេញ ដើម្បីរង់ចាំការសម្រេចពីក្រុមគ្រួសារ និងស្ថានទូត៕