ផ្ទះ ព័ត៌មានជាតិ ប្រើវិធានការក...

ប្រើវិធានការក្តៅហើយ! ណែនាំលើកទី១ លើកទី២មិនស្តាប់ មិនអនុវត្តតាម លើកទី៣ឃាត់ទុកមួយថ្ងៃ និងណែនាំឲ្យគ្របឲ្យបានត្រឹមត្រូវ ទើបអនុញ្ញាតឲ្យទៅបាន

0

បន្ទាយមានជ័យ: យោងតាមផេកការិយាល័យផ្សព្វផ្សាយ តាមបណ្តាញសង្គម បានឲ្យដឹងថា ក្រោយពីបានចុះអប់រំណែនាំ រថយន្តដឹកដីដែលបើកចូលក្នុងក្រុងលើកទី១ លើកទី២ នៅតែមិនស្តាប់ និងមិនអនុវត្តតាមការណែនាំ របស់រដ្ឋបាលក្រុងសិរីសោភ័ណ ពិសេសបើកបរលឿនជាដើមនោះ គណ:បញ្ជាការឯកភាពក្រុងសិរីសោភ័ណ បានធ្វើការចុះជាលើកទី៣ ដោយប្រើវិធានការក្តៅ ឃាត់រថយន្តទុកមួយកន្លែង។

ការចុះណែនាំជាលើកទី៣ នេះធ្វើឡើងនៅព្រឹកថ្ងៃទី១៩ ខែមីនា ឆ្នាំ ២០២០ ដឹកនាំដោយលោក ហ៊ឹល រ៉ាយ៉ា អភិបាលនៃគណ:អភិបាលក្រុង និងជាប្រធានគណ:បញ្ជាការឯកភាពក្រុង លោកអធិការក្រុង មេបញ្ជាការមូលដ្ឋាន កងរាជអាវុធហត្ថក្រុង ធ្វើឡើងនៅចំណុចផ្លូវកែង សាលាក្រុង (ផ្លូវ៧មករា)។

ការចុះអនុវត្តនោះ គណ:បញ្ជាការឯកភាពក្រុង បានឃាត់រថយន្តដែលមិនគ្រប ទុករយ:ពេលមួយថ្ងៃ ហើយតម្រូវគ្របតង់កៅស៊ូ ឲ្យបានត្រឹមត្រូវ ទើបអាចចេញរថយន្តបាន។ ចំពោះវិធានការក្តៅនេះ ធ្វើឡើងក្រោយពេលដែលពិនិត្យឃើញថា រថយន្តធំធុន រថយន្តដឹកដី បើកបរចូលក្នុងក្រុង មិនអនុវត្តតាមការណែនាំ របស់រដ្ឋបាលក្រុង បើទោះបីជា មានការចុះអប់រំ២លើករួចមកហើយយ៉ាងណាក៏ដោយ នៅតែមានរថយន្តដឹកដីមួយចំនួន មិនអនុវត្តតាម ដូច្នេះហើយលើកទី៣នេះ អាជ្ញាធរ ធ្វើការឃាត់ទុក្ខតែម្តង ដោយមិនអនុញ្ញាត ឲ្យធ្វើដំណើរលើដងផ្លូវរយ:ពេលមួយថ្ងៃ ហើយតម្រូវគ្របតង់កៅស៊ូ ឲ្យបានត្រឹមត្រូវ ទើបអាចចេញបាន។

ជាមួយនឹងការដាក់ចេញនូវវិធានការក្តៅនេះ លោក ហ៊ឹល រ៉ាយ៉ា អភិបាលនៃគណ:អភិបាលក្រុង នឹងជាប្រធានគណ:បញ្ជាការឯកភាពក្រុងសិរីសោភ័ណ ក៏បានបញ្ជាក់ឲ្យដឹងថា ៖ ចាប់ពេលនេះ ម៉ោងនេះទៅ គឺយើងនឹងធ្វើការរឹតបន្តិតចំពោះរថយន្តដឹកដីណាដែលមិនគោរពតាមការណែនាំ ហើយបើឃើញរថយន្តដឹកដីណាមិនគ្របត្រឹមត្រូវ កងកម្លាំងយើងឃើញនៅទីណា យើងនឹងធ្វើការឃាត់ទុកមួយកន្លែងតែម្តង ដោយគ្មានការយោគយល់។ ជាមួយគ្នានេះ ក៏បានធ្វើការសំណូមដល់ម្ចាស់យានយន្តទាំងអស់ សូមចូលរួមគោរពច្បាប់ចរាចណ៍ កុំបើកបរលឿន ពិសេសពេលចូលនៅក្នុងក្រុង ដើម្បីកាត់បន្ថយគ្រោះថ្នាក់ចរាចណ៍ផ្សេងៗ៕

មតិយោបល់