សៀមរាបៈ កាលពីវេលាម៉ោង៣និង ២០នាទីឈានចូលថ្ងៃទី២១ ខែមីនា ឆ្នាំ២០២០ មានករណីរថយន្តកាមរីបាឡែន១គ្រឿងដឹកឈើ ផ្ទុះកង់ក្រឡាប់ចូលប្រឡាយ ត្រូវបានកម្លាំងនគរបាលទឹកវិល សហការស្ទូចយករថយន្តនិងឈើល្មើសច្បាប់ទៅរក្សាទុ ។

ករណីរថយន្តម៉ាកកាមរីបាឡែន ពណ៌ទឹកមាស ពាក់ផ្លាកលេខភ្នំពេញ 2n 5893 បានបើកបរ តាមបណ្ដោយផ្លូវជាតិលេខ៦ ទិសដៅពីលិចទៅកើត លុះមកដល់ចំណុចកើតហេតុ ក្នុងភូមិសណ្ដាន់ សង្កាត់ទឹកវិល ក្រុងសៀមរាប ខេត្តសៀមរាប បានបែកកង់ក្រឡាប់រថយន្ត ។ ក្រោយកើតហេតុម្ចាស់រថយន្តបានរត់គេចខ្លួនបាត់ នៅក្នុងរថយន្តនោះសុទ្ធតែឈើប្រភេទឃ្នង់ និងក្រញ៉ូង ល្មើសច្បាប់ ។ ហើយកម្លាំងប៉ុស្ដិ៍នគរបាលរដ្ឋបាលទឹកវិល បានស្ទូចយកមរក្សាទុកនៅប៉ុស្ដិ៍ ដើម្បីធ្វើការត្រួតពិនិត្យនិងស្រាវជ្រាវអត្តសញ្ញាណម្ចាស់រថយន្ត ។

នៅថ្ងៃនោះដដែលកម្លាំងអធិការដ្ឋាននិងប៉ុស្ដិ៍ ដែលដឹកនាំដោយលោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាប ធ្វើការសហការជាមួយកម្លាំងការិយាល័យនគរបាលសេដ្ឋកិច្ច ជំនាញរដ្ឋបាលព្រៃខេត្តសៀមរាបធ្វើការត្រួតពិនិត្យ និងប្រគល់ទៅឲ្យការិយាល័យនគរបាលសេដ្ឋកិច្ច ជំនាញរដ្ឋបាលព្រៃឈើទទួល យកទៅបន្តតាមនីតិវិធី ច្បាប់រដ្ឋបាលព្រៃឈើ ៕