ព័ត៌មានជាតិ

ជនសង្ស័យ​ម្នាក់​ ជាប់អន្ទាក់សមត្ថកិច្ច បន្ទាប់ពីធ្វើសកម្មភាព​លួច​ម៉ូតូនារីម្នាក់ បានរយៈពេល១៥ថ្ងៃ

កណ្ដាល:​ យោងតាមអគ្គស្នងការដ្ឋាននគរបាលជាតិ បានឲ្យដឹងថា ជនសង្ស័យ​ម្នាក់​ ត្រូវ​បាន​នគរបាល​ស្រុក​មុខកំពូល​ចាប់ខ្លួន​ ក្រោយ​ពី​ជនសង្ស័យ​រូប​នេះ​ ធ្វើ​សកម្មភាព​លួច​ម៉ូតូ​នារី​ម្នាក់​បាន​សម្រេច​កាលពី​ថ្ងៃ​ទី​៥​ ខែមីនា​ ឆ្នាំ​២០២០​ វេលា​ម៉ោង​១០​និង​០០​នាទី​ ត្រង់​ចំណុច​ផ្ទះ​របស់​ឈ្មោះ​ ស៊ុន​ លាង​ហ៊ួ​រ​ ស្ថិត​ក្នុងភូមិ​ក្រោម​ ឃុំ​ព្រែក​អញ្ចាញ​ ស្រុក​មុខកំពូល​ ដែល​ករណី​ចាប់ខ្លួន​នេះ​ ធ្វើ​ឡើង​នៅ​វេលា​ម៉ោង​១១​និង​១០​នាទី​ ថ្ងៃ​ទី​២៤​ ខែមីនា​ ឆ្នាំ​២០២០​ ត្រង់​ចំណុច​យានដ្ឋាន​ជួសជុល​រថយន្ត​ ហេង​ ហេង​ ស្ថិត​ក្នុងភូមិ​កណ្ដាល​ ឃុំ​ព្រែក​អញ្ចាញ​ ស្រុក​មុខកំពូល​ ។

​ជនសង្ស័យ​ឈ្មោះ​ វ៉ា​ ឈុ​ន​លី​ ភេទ​ប្រុស​ អាយុ​២៧​ឆ្នាំ​ ជនជាតិ​ខ្មែរ​ មុខរបរ​បើករថយន្ដ​ដឹក​ឥដ្ឋ​ មាន​ទីលំនៅ​ភូមិ​ខ្ចៅ​ ឃុំ​ស្វាយ​ព​ន្ធ័​ ស្រុក​កងមាស​ ខេត្តកំពង់ចាម​ ។​ ចំណែក​ជនរង​គ្រោះ​ឈ្មោះ​ សឿង​ ដា​នី​ ភេទ​ស្រី​ អាយុ​២៦​ឆ្នាំ​ ជនជាតិ​ខ្មែរ​ មុខរបរ​កម្មករ​លើក​ឥដ្ឋ​ បច្ចុប្បន្ន​ស្នាក់​នៅ​ភូមិ​ក្រោម​ ឃុំ​ព្រែក​អញ្ចាញ​ ស្រុក​មុខកំពូល​ខេត្តកណ្ដាល​ ។​ ដោយឡែក​ស​ម្ភា​រ:​បាត់បង់​មាន​៖​ ម៉ូតូ​ម៉ាក​ហុងដា​ ធុន​សេ​125​ ពណ៌​ក្រហម​ ស៊េរី​ឆ្នាំ​២០១៨​ ពាក់ផ្លាក​លេខ​ភ្នំពេញ​1HF.3600 ​ចំនួន​១​គ្រឿង​ ។​

​ជនសង្ស័យ​ធ្លាប់​មក​ធ្វើ​ជា​កម្មករ​បើករថយន្ដ​ដឹក​ឥដ្ឋ​ឲ្យ​ម្ចាស់​សិប្បកម្ម​ម្ដង​រួច​មក​ហើយ​ តែ​បាន​ជាង​១០​ថ្ងៃ​ក៏​ឈប់​ធ្វើ​ការងារ​ត្រឡប់​ទៅ​ផ្ទះ​របស់​ខ្លួន​នៅ​ឯ​ខេត្ដកំពង់ចាម​វិញ​ទៅ​ ។​ លុះ​មក​ដល់​ថ្ងៃ​ទី​៥​ ខែមីនា​ ឆ្នាំ​២០២០​ ជនសង្ស័យ​បាន​ចេញពីផ្ទះ​របស់​ខ្លួន​នៅ​ឯ​ខេត្ដកំពង់ចាម​ មក​ផ្ទះ​ថៅកែ​សិប្បកម្ម​វិញ​ ក្នុង​គោលបំណង​សុំ​ធ្វើការ​ងារ​វិញ​ តែ​មិន​ជួប​ថៅកែ​ទេ​ ភ្លាម​នោះ​ជនសង្ស័យ​ក៏​ឃើញ​ម៉ូតូ​ជន​រង​គ្រោះ​ទុក​នៅ​ក្បែ​នោះ​ ហើយ​ខ្លួន​មាន​សោរ​ស្រាប់​ដែល​ខ្លួន​បាន​ចម្លង​ទុក​កាលពី​នៅ​ធ្វើការ​ជាមួយ​គ្នា​ពី​មុន​មក​ ក៏​ធ្វើ​សកម្មភាព​លួច​ជិះ​ចេញ​ទៅ​បាត់​តែ​ម្ដង​ ។​ ក្រោយមក​នារី​រង​គ្រោះ​បាន​ដាក់​ពាក្យបណ្ដឹង​មក​ប៉ុស្ដិ៍​នគរបាល​ព្រែក​អញ្ចាញ​ដើម្បី​ស្រាវជ្រាវ​ចាត់ការ​តាម​ច្បាប់​ ។​ លុះ​ជាង​កន្លះ​ខែ​ក្រោយមក​ មក​ដល់​ថ្ងៃ​ទី​២៤​ ខែមីនា​ ឆ្នាំ​២០២០​ ជន​រង​គ្រោះជា​ម្ចាស់​ម៉ូតូ​ដឹង​ថា​ ជនសង្ស័យ​កំពុង​ដូរ​កង់​រថយន្ដ​នៅ​ចំណុច​យានដ្ឋាន​ជួសជុល​រថយន្ត​ហេង​ហេង​ ស្ថិត​ក្នុងភូមិ​កណ្ដាល​ ឃុំ​ព្រែក​អញ្ចាញ​ ភ្លាម​នោះ​ក៏​ហៅ​ប្ដី​របស់​ខ្លួន​ទៅ​ធ្វើការ​ឃាត់ខ្លួន​ រួច​ប្រគល់​ឲ្យ​សមត្ថកិច្ច​ប៉ុស្តិ៍​នគរបាល​ព្រែក​អញ្ចាញ​តែ​ម្តង​ ។​

​នៅ​ចំពោះ​មុខ​សមត្ថកិច្ច​ជនសង្ស័យ​បាន​ឆ្លើយ​សារភាព​ថា​ ខ្លួន​ពិតជា​បាន​លួច​ម៉ូតូ​របស់​ជន​រង​គ្រោះ​ កាលពី​ថ្ងៃ​ទី​៥​ ខែមីនា​ឆ្នាំ​ ២០២០​ វេលា​ម៉ោង​១០​និង​០០​នាទី​ ចំណុច​ផ្ទះ​របស់​ឈ្មោះ​ ស៊ុន​ លាង​ហ៊ួ​រ​ ពិតប្រាកដ​មែន​។​

ជនសង្ស័យ​ត្រូវ​បាន​សមត្ថកិច្ច​ជំនាញ​កសាង​សំណុំរឿង​ចាត់ការ​តាម​នីតិវិធី​ច្បាប់​ ៕

មតិយោបល់