កណ្ដាលៈ យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា នគរបាលស្រុកអង្គស្នួល ក្រោមការបញ្ជាដោយផ្ទាល់ពីលោកឧត្តមសេនីយ៍ត្រី ឈឿន សុចិត្ត ស្នងការខេត្តកណ្ដាល ដឹកនាំដោយលោកវរសេនីយ៍ឯក មាន សំណាង អធិការស្រុកអង្គស្នួល ចុះបង្ក្រាបឃាត់ខ្លួនជនសង្ស័យ៧នាក់ ដែលបន្លំខ្លួនធ្វើជាព្រះសង្ឃដើរបិណ្ឌបាត្រ និងចូលដេកក្នុងផ្ទះសំណាក់ ប្រើប្រាស់គ្រឿងញៀន កាលពីថ្ងៃទី២៧ ខែមីនា ឆ្នាំ២០២០ វេលាម៉ោង១៩និង៣០នាទី នៅចំណុចផ្ទះសំណាក់ម៉ាហេង ភូមិព្រៃក្រឡាញ់ ឃុំលំហាច ស្រុកអង្គស្នួល ខេត្តកណ្តាល ។
លោកវរសេនីយ៍ មាន សំណាង អធិការនគរបាលស្រុកអង្គស្នួល ឲ្យដឹងថា ដោយមានការចង្អុលបង្ហាញពីលោកឧត្តមសេនីយ៍ត្រី ឈឿន សុចិត្ត ស្នងការខេត្តកណ្ដាល ក្រោយទទួលព័ត៌មានច្បាស់ការថា នៅផ្ទះសំណាក់ ម៉ាហេង មានមុខសញ្ញាគួរឲ្យសង្ស័យ ភ្លាមនោះកម្លាំងនគរបាលស្រុក ចុះបង្ក្រាបដល់កន្លែងកើតហេតុ ឃាត់ខ្លួនជនសង្ស័យចំនួន៧នាក់ និងដកហូតវត្ថុតាងបានមាន៖
1-ទូរស័ព្ទចំនួន៣គ្រឿង ,2-រថយន្តម៉ាកកាមរីពណ៌១គ្រឿងពណ៌សំ បកឪឡឹកស៊េរីឆ្នាំ95 ពាក់ផ្លាកលេខភ្នំពេញ3E-7988 ,3-បាត្រលោកចំនួន៥ ,4-ឆ័ត្រចំនួន៤ ,5-កូនកាំបិតចុងស្រួចចំនួន១ ,6-កាបូបស្ពាយ (សាក់កាដូ)ចំនួន៧ ,7-ស្បង់ចីវរចំនួន៦កំភ្លេរ និងឧបករណ៍ប្រើប្រាស់សារធាតុញៀនមួយចំនួន ។
លោកអធិការបានឲ្យដឹងទៀតថា ជនសង្ស័យចំនួន០៧នាក់ ៖
ទី១-ឈ្មោះទៀប សុខម៉ៅ ភេទប្រុស អាយុ៣៥ឆ្នាំមុខរបរមិនពិត នៅភូមិខ្នុរ ឃុំកំពង់សឹង ស្រុកបាភ្នំ ខេត្តព្រៃវែង។
២-ឈ្មោះ សេះ ឌី ភេទប្រុសអាយុ២៥ឆ្នាំ មុខរបរមិនពិត នៅភូមិវាលត្បាល ឃុំមានជ័យ ស្រុកឈូក ខេត្តកំពត។
៣-ឈ្មោះសន ឆឺត ភេទប្រុស អាយុ២០ឆ្នាំ ជនជាតិខ្មែរមុខរបរមិនពិត នៅភូមិព្រៃពី ឃុំស្រែជាខាងជើង
ស្រុកដងទង់ ខេត្តកំពត។
៤-ឈ្មោះច្រឹប មាន ភេទប្រុស អាយុ១៩ឆ្នាំ ជនជាតិខ្មែរ មុខរបរមិនពិត នៅភូមិព្រៃពី ឃុំស្រែជាខាងជើង ស្រុកដងទង់ខេត្តកំពត។
៥-ឈ្មោះ ហ៊ុន រុន ភេទប្រុសអាយុ១៨ឆ្នាំ ជនជាតិខ្មែរ មុខរបរមិនពិតនៅភូមិព្រៃពី ឃុំស្រែជាខាងជើង ស្រុកដងទង់ ខេត្តកំពត ។
៦-ឈ្មោះ សន ទីន ភេទប្រុស អាយុ២៦ឆ្នាំជនជាតិខ្មែរ មុខរបរមិនពិត នៅភូមិព្រៃពី ឃុំស្រែជាខាងជើង ស្រុកដងទង់ ខេត្តកំពត។
៧-ឈ្មោះ ឈៀង ឆវី ភេទប្រុស អាយុ៣៩ឆ្នាំ ជនជាតិខ្មែរ មុខរបរបើកបរនៅភូមិអូតាគី ឃុំអូតាគី ស្រុកថ្មគោលខេត្តបាត់ដំបង។
តាមចម្លើយសារភាពរបស់ជនសង្ស័យថា ខ្លួនបានស្គាល់គ្នាតាមឆាត ហើយណាត់ជួបគ្នានៅកំបូលដោយជួលរថយន្ត សម្រាប់ដឹកខ្លួនដើរបិណ្ឌបាត្រក្នុង១នាក់យកតម្លៃ២០០០០រៀល ហើយខ្លួនចាប់ផ្តើមដើរបិណ្ឌបាត្រកាលពីថ្ងៃទី២៦ មីនា ២០២០ ចាប់ពីផ្សារថ្នល់ទទឹង ដល់កំបូល ហើយប្តូរខោអាវនៅលើរថយន្ត។
សូមបញ្ជាក់ថា ជនសង្ស័យប្រើសារធាតុញៀន៣ខែមកហើយ ។ ចំពោះករណីនេះកម្លាំងជំនាញកំពុងបន្តចាត់ការតាមនីតិវិធី៕
មតិយោបល់