ភ្នំពេញៈ កាលពីវេលាម៉ោង ៥និង៣៥នាទីព្រឹកថ្ងៃទី៩ ខែមេសា ឆ្នាំ២០២០ ត្រង់ចំណុចផ្លូវ២៧១ នៅលើស្ពានអាកាសស្ទឹងមានជ័យទី១ ខណ្ឌមានជ័យ រាជធានីភ្នំពេញ មានករណីឆក់ បណ្ដាលឲ្យស្ត្រីម្នាក់ ស្លាប់បាត់បង់ជីវិត។

ជនរងគ្រោះឈ្មោះ ហុង សុខចេង ភេទស្រី អាយុ៣៥ឆ្នាំ មុខរបរលក់ដូរ ស្នាក់នៅភូមិព្រែកទាល់ សង្កាត់ស្ទឹងមានជ័យទី២ ខណ្ឌមានជ័យ។

ដំណើររឿង៖ មុនកើតហេតុគេឃើញជនរងគ្រោះ ជិះម៉ូតូ១គ្រឿង ម៉ាកហុងដា Moone ពណ៌ខ្មៅ ពាក់ផ្លាកលេខ ភ្នំពេញ 1-HJ 6984 ធ្វើដំណើរចេញពីចំណុចខាងក្រោយពេទ្យរុស្ស៊ី នៅផ្លូវ៤៣០ ខណៈនោះ ស្រាប់តែលេចមុខជនសង្ស័យជិះម៉ូតូពីក្រោយ ធ្វើសកម្មភាពឆក់ខ្សែ.កពីជនរងគ្រោះ រួចបើករត់។ ភ្លាមៗផងដែរ ជនរងគ្រោះ និងក្រុមគ្រួសារ បាននាំគ្នាជិះម៉ូតូដេញជនសង្ស័យ តាំងពីចំណុចកើតហេតុ រហូតដល់លើស្ពានអាកាសស្ទឹងមានជ័យ ក៏មានបក្ខពួកជនសង្ស័យម្នាកទៀត ជិះម៉ូតូតាមពីក្រោយ បានធាក់ម៉ូតូជនរងគ្រោះដួល បណ្ដាលឲ្យបោកក្បាល រងរបួសធ្ងន់ ត្រូវបានក្រុមគ្រួសារដឹកទៅសង្គ្រោះ ទៅមន្ទីរពេទ្យរុស្ស៊ី តែដោយសារស្ថានភាពធ្ងន់ធ្ងរពេក ក៏បានដាច់ខ្យល់ស្លាប់តែម្ដង។

ក្រោយកើតហេតុ សមត្ថកិច្ច បានចុះទៅដល់ទីតាំងកើតហេតុ រួចធ្វើកំណត់ហេតុ និងកំណត់អត្តសញ្ញាណជនសង្ស័យ ដើម្បីបើកការស្រាវជ្រាវ តាមចាប់យកមកផ្ដន្ទាទោសតាមផ្លូវច្បាប់។ ចំណែកសព បានប្រគល់ឲ្យសាច់ញាតិ ដឹកយកទៅធ្វើបុណ្យតាមប្រពៃណី៕