កណ្ដាលៈ នៅថ្ងៃទី៨ ខែមេសា ឆ្នាំ២០២០ វេលាម៉ោង ៨និង០០នាទី មានករណីកាប់ដើមឈើ បណ្ដាលឲ្យដួលបោកសង្កត់មនុស្សស្លាប់ ចំណុចដីចម្ការដើមប្រេងខ្យល់ របស់ឈ្មោះ បាក់ ងនឈាង ស្ថិតក្នុងភូមិកំពង់កុង ឃុំកំពង់កុង ស្រុកកោះធំ ខេត្តកណ្តាល ។

ជនរងគ្រោះឈ្មោះ ហ៊ត វ៉ាត ភេទប្រុស អាយុ ៥៧ឆ្នាំ (ស្លាប់) ជនជាតិខ្មែរមុខបរ កសិករមានទីលំនៅ ភូមិត្របែកពក ឃុំកំពង់កុង ស្រុកកោះធំ ខេត្តកណ្តាល ។

សភាពនៃរឿងហេតុ៖ តាមការសួរបំភ្លឺឈ្មោះ ហេង ធី ត្រូវជាប្រពន្ធជនរងគ្រោះ និងឈ្មោះ អូក ហ៊ាង ដែលត្រូវជាកូនប្រសារជនរងគ្រោះបានឲ្យដឹងថា៖ គាត់ និងប្តីរបស់គាត់ ដែលជាជនរងគ្រោះ និងកូនបានទិញដើមប្រេងខ្យល់ របស់ឈ្មោះ បាក់ ងនឈាង ដើម្បីអារ យកមកធ្វើផ្ទះ លុះនៅវេលាម៉ោង ០៨និង០០នាទីថ្ងៃទី៨ ខែមេសា ឆ្នាំ២០២០ ជនរងគ្រោះ និងកូនប្រសារឈ្មោះ អូក ហ៊ាង បានជួលឈ្មោះ ខន ចន ដើម្បីឲ្យជួយ អារ ផ្ដួលរលំដើមប្រេងខ្យល់ លុះដើមប្រេងខ្យល់ដួលរលំ ទៅទើរនិងដើមឈើមួយដើមទៀតភ្លាមនោះជនរងគ្រោះបានស្ទុះចូលទៅមើល តែចៃដន្យដើមឈើ ដែលត្រូវដួលរលំនោះ ក៏ដួលរលំបោក បណ្តាលឲ្យត្រូវជនរងគ្រោះ បាក់ធ្គាមខាងឆ្វេងរបួសជាទម្ងន់ ភ្លាមនោះក្រុមគ្រួសារ ជនរងគ្រោះបានបញ្ជូនជនរងគ្រោះយកទៅមន្ទីរពេទ្យបង្អែកស្រុកកោះធំ ដើម្បីព្យាបាល រហូតដល់ម៉ោង ១០និង៣០ ថ្ងៃដដែល លោកគ្រូពេទ្យមិនអាចជួយសង្រ្គោះបាន ជនរងគ្រោះបានស្លាប់នៅមន្ទីរពេទ្យបង្អែកស្រុកកោះធំ ហើយក្រុមគ្រួសារបាន ដឹកសាកសពជនរងគ្រោះ យកមកលំនៅដ្ឋាន ទើបរាយការណ៍ជូនសមត្ថកិច្ចប៉ុស្តិ៍ និង អធិការដ្ឋាននគរបាលស្រុក ។

ការសន្និដ្ឋាន៖ របស់លោកគ្រូពេទ្យ និងផ្នែកជំនាញជនរងគ្រោះ ពិតជាស្លាប់ ដោយដើមឈើរលំបោកសង្កត់ បណ្តាលឲ្យស្លាប់ ។
ក្រោយពីពិនិត្យចប់សព្វគ្រប់ សាកសពត្រូវបានប្រគល់ជូនក្រុមគ្រួសារ ធ្វើបុណ្យតាមប្រពៃណី៕