ព្រះសីហនុៈ កាលពីម៉ោង ២០ និង ០០នាទីថ្ងៃទី១៣ ខែមេសា ឆ្នាំ២០២០ លើផ្លូវជាតិលេខ៤ ចន្លោះបង្គោលគីឡូម៉ែត្រលេខ ២០០-២០១ ក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ មានករណីគ្រោះថ្នាក់ចរាចរណ៍មួយ កើត
ឡើងរវាងរថយន្ត និងម៉ូតូ។

សមត្ថកិច្ច បានឲ្យដឹងថា រថយន្តម៉ាកនីសសាន់ ពណ៌ស ពាក់ផ្លាកលេខ ព្រះសីហនុ ៣A-៩៣៨៩ មានទិសដៅពីខេត្ត ព្រះសីហនុ ឆ្ពោះទៅរាជធានីភ្នំពេញ (អ្នកបើកបរមិនទាន់ស្គាល់អត្តសញ្ញាណ បានរត់គេខ្លួនបាត់) បុកប៉ះជាមួយម៉ូតូ ម៉ាក HONDA WAVE ពណ៌ក្រហម គ្មានផ្លាកលេខ មានទិសដៅផ្ទុយគ្នា បើកបរដោយឈ្មោះ ណាវ រឿន ភេទប្រុស អាយុ ៤៥ឆ្នាំ មានទីលំនៅភូមិ៣ សង្កាត់១ ក្រុងព្រះសីហនុ ខេត្តព្រះសីហនុ (ស្លាប់)។

ក្រោយកើតហេតុ សាកសព ត្រូវបានរក្សាទុក រង់ចាំប្រគល់ជូនសាច់ញាតិ ចំណែកវត្ថុតាងរថយន្ត និងម៉ូតូ យកមករក្សាទុកជាបណ្តោះអាសន្ននៅអធិការដ្ឋាន នគរបាលស្រុកព្រៃនប់៕