ភ្នំពេញ: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា សាលាដំបូងរាជធានីភ្នំពេញ បានបន្តចំណាត់ការអនុវត្តច្បាប់ដាក់ទោស លើក្រុមជនប្រព្រឹត្តគ្រឿងញៀននៅមជ្ឈមណ្ឌលកម្សាន្តរ៉ុកបន្ថែមទៀត ក្រោយករណីមួយ ទើបនឹងប្រកាសសាលក្រមរួចដោយតុលាការ កាលពីចុងខែ កុម្ភ: កន្លងមកនេះ។
សេចក្តីប្រកាសព័ត៌មានរបស់សាលាដំបូងរាជធានីភ្នំពេញ ចុះថ្ងៃទី២០ មីនា ឆ្នាំ២០២០ ដែលបណ្តាញសារព័ត៌មាន ទើបទទួលបាននៅថ្ងៃពុធនេះ បានបញ្ជាក់ថា សាលាដំបូងកំពុងស៊ើប សួរ លើសំណុំរឿងមួយករណីទៀត ដែលបានប្រព្រឹត្តទៅនៅចំណុចមជ្ឈមណ្ឌលកម្សាន្តរ៉ុកនោះផងដែរ ដោយចៅក្រមស៊ើបសួរកំពុងសួរចម្លើយ អ្នក ពាក់ព័ន្ធ, ប្រមូលភស្តុតាងនានា និងត្រៀមបញ្ជូនទៅជំនុំជំរះក្នុងពេល ឆាប់ៗខាងមុខនេះ។
សេចក្តីប្រកាសព័ត៌មានដដែល របស់សាលាដំបូង រាជធានីភ្នំពេញ នៅបានបញ្ជាក់ដែរថា កន្លងមកនេះ គឺនៅថ្ងៃទី២៧ ខែកុម្ភ: ឆ្នាំ២០២០ សាលាដំបូងរាជធានី បានប្រកាសសាលក្រម នៃសំណុំរឿងព្រហ្ម ទណ្ឌលេខ១៣១៥ ដែលមានជនជាប់ចោទចំនួន ៣៤នាក់ ដែលត្រូវបានចោទប្រកាន់ពីបទ ចាត់ចែងឲ្យប្រើប្រាស់ដោយខុស ច្បាប់នូវសារធាតុញៀន, សមគំនិតក្នុងអំពើប្រើប្រាស់ ដែលប្រព្រឹត្តនៅចំណុចមជ្ឈមណ្ឌលកម្សាន្តរ៉ុក ស្ថិតនៅលើមហាវិថីព្រះមុនីវង្ស សង្កាត់ទន្លេបាសាក់ ខណ្ឌចម្ការមន រាជធានីភ្នំពេញ កាលពីថ្ងៃទី២៣ ខែកុម្ភ: ឆ្នាំ២០១៩ ដោយផ្តន្ទាទោសជនជាប់ចោទម្នាក់ៗដាក់ពន្ធនាគារ ចន្លោះពី១ឆ្នាំ៦ខែ ដល់៤ឆ្នាំ និងពិន័យជាប្រាប់ពី៣លានរៀល ដល់៨លានរៀល។

នេះបើតាមសេចក្តីប្រកាសព័ត៌មានរបស់សាលាដំបូងរាជធានីភ្នំពេញ ដែលគេហទំព័រ និងព័ត៌មានអគ្គស្នងការដ្ឋាននគរបាលជាតិ ទើបទទួលបាន នៅព្រឹកថ្ងៃទី២២ ខែមេសា ឆ្នាំ២០២០នេះ៖