ស្វាយរៀងៈ កាលពីវេលាម៉ោង៦និង៣០នាទីថ្ងៃទី០៤ ខែឧសភា ឆ្នាំ២០២០ នៅផ្លូវជាតិលេខ០១ ចន្លោះគីឡូម៉ែត្រ១៣២/១៣៣ មានករណីគ្រោះថ្នាក់ចរាចរណ៍មួយកើតឡើង ស្រ្តីធ្វើការផ្នែកអនាម័យនៅកាស៊ីណូ ជិះម៉ូតូមិនប្រកាន់ស្តាំ ត្រូវរថយន្តរត់តាក់ស៊ីបុក បណ្តាលឲ្បបាក់ជើងម្ខាងរងរបួសធ្ងន់ ស្ថិតក្នុងភូមិ ព្រៃសម្ភ័រ ឃុំសំបួរ ស្រុកស្វាយទាប ខេត្តស្វាយរៀង ។

សមត្ថកិច្ចបានឲ្យដឹងថា នៅមុនពេលកើតហេតុ មានម៉ូតូ១គ្រឿងម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ផ្លាកលេខ ស្វាយរៀង 1G 9822 បើកបរដោយឈ្មោះ ខៀវ ចែ ភេទស្រី អាយុ៤៥ឆ្នាំ មុខរបរអនាម័យនៅកាស៊ីណូ មានទីលំនៅក្នុងភូមិ ស្វាយជ្រុំ ឃុំស្វាយជ្រុំ ស្រុកស្វាយជុំ ខេត្តស្វាយរៀង លុះបើកមកដល់ចំណុចកើតហេតុ បានប៉ះរថយន្ត១គ្រឿងម៉ាកហាយឡែនឌឺរ ពណ៌ទឹកប្រាក់ ពាក់ផ្លាកលេខ ស្វាយរៀង 2A 1558 បើកបរដោយឈ្មោះ គុច សំអៀន ភេទប្រុស អាយុ៣៥ឆ្នាំ មុខរបរអ្នករត់តាក់ស៊ី មានទីលំនៅភូមិ ពោធិវង្ស ឃុំប្រសូត្រ ស្រុកស្វាយទាប ខេត្តស្វាយរៀង បណ្តាលឲ្យភាគីខាងម៉ូតូដួលបាក់ជើងឆ្វេងរងរបួសធ្ងន់ បានដឹកបញ្ចូនទៅព្យាបាលនៅមន្ទីរពេទ្យបង្អែកស្រុកស្វាយទាប ភ្លាមៗផងដែរ ។

ក្រោយពេលកើតហេតុ សមត្ថកិច្ចមូលដ្ឋានបានចុះទៅដល់ទីតាំងខាងលើ ដើម្បីពិនិត្យនិងធ្វើការវាសវែងយកវត្ថុតាងទៅរក្សាទុក នៅអធិការដ្ឋាននគរបាលស្រុកស្វាយទាប ចាត់ការតាមនីតិវិធីផ្លូច្បាប់ ៕