កណ្ដាល: នៅវេលាម៉ោង ២និង១០នាទីរសៀលថ្ងៃទី១៧ ខែឧសភា ឆ្នាំ២០២០ មានករណីហិង្សាក្នុងគ្រួសារ និងលួចលុយម្ដាយទិញសារធាតុញៀន ស្ថិតក្នុងភូមិកំពង់ថ្កុល ឃុំសំពៅពូន ស្រុកកោះធំ ខេត្តកណ្ដាល សូមបញ្ជាក់ ជនសង្ស័យត្រូវនគរបាលឃាត់ខ្លួន នៅថ្ងៃទី១៨ ខែឧសភា ឆ្នាំ២០២០ ក្រោយទទួលបណ្ដឹងពីជនរងគ្រោះជាម្ដាយ។

ជនរងគ្រោះឈ្មោះ ម៊ើ ស្រី ភេទស្រី អាយុ ៥០ឆ្នាំ (ម្ដាយ) មុខរបរ កសិករ ជនជាតិខ្មែរ មានទីលំនៅភូមិឃុំកើតហេតុខាងលើ ។
ជនសង្ស័យឃាត់ខ្លួនឈ្មោះ ហ៊ាង ឈាង ភេទប្រុស អាយុ ២៧ឆ្នាំ (កូន) ជនជាតិខ្មែរ រស់នៅភូមិឃុំជាមួយគ្នា។

សម្ភារ:ខូចខាតបាត់បង់៖
-ប្រាក់រៀលចំនួន ៥,៣០០,០០០៛។
វត្ថុតាងដកហូត៖
-ប្រាក់រៀលចំនួន ៥,២១០,០០០៛។

ដំណើររឿង៖ មុនពេលកើតហេតុជនសង្ស័យតែងតែប្រើប្រាស់សារធាតុញៀន និងជេរប្រមាថគំរាមសម្លាប់ឪពុកម្ដាយ បំផ្លាញទ្រព្យសម្បត្តិក្នុងផ្ទះ លុះនៅថ្ងៃកើតហេតុទី១៧ ខែឧសភា ឆ្នាំ២០២០ ជនសង្ស័យបានលួចលុយយ៉ាងច្រើន ហើយគេចខ្លួនបាត់តែម្ដង រហូតព្រឹកថ្ងៃទី១៨ ខែឧសភា ឆ្នាំ២០២០ ជនរងគ្រោះក៏ទៅដាក់ពាក្យបណ្ដឹង ដើម្បីឲ្យសមត្ថកិច្ចជួយអន្តរាគមន៍ ក្រោយទទួលបានបណ្ដឹងភ្លាម កម្លាំងនគរបាលប៉ុស្តិ៍សំពៅពូន ចុះឃាត់ខ្លួនជនសង្ស័យមកសួរនាំ ហើយជនសង្ស័យបានឆ្លើយសារភាពថា ខ្លួនពិតជាបានលួចប្រាក់ម្ដាយប្រាកដមែន ។

ករណីនេះ ជនសង្ស័យត្រូវបានកម្លាំងនគរបាល បញ្ជូនខ្លួនទៅអធិការដ្ឋាននគរបាលស្រុក ដើម្បីកសាងសំណុំរឿងទៅតាមនីតិវិធីច្បាប់៕