ភ្នំពេញៈ ដើមក្ងោកចាស់មួយដើមបានឫសកែវដួលរលំសង្កត់ទៅលើរថយន្តCRV និងដំបូលរោងចំណីអាហារ បណ្ដាលឲ្យរងការខូចខាតយ៉ាងដំណំ ដោយហេតុការណ៍បានបង្កឲ្យមានការភ្ញាក់ផ្អើលដល់អ្នកដំណើរ និងប្រជាពលរដ្ឋកាលពីម៉ោងជាង៤រសៀលថ្ងៃទី៤ ខែកក្កដា ឆ្នាំ២០១៦ នៅចំណុចផ្លូវលេខ៣៧៤កែងផ្លូវលេខ១៩៩ ក្នុងសង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ។

ប្រភពីកន្លែងកើតហេតុបានរៀបរាប់ថា នៅមុនពេលកើតហេតុគេឃើញរថយន្តម៉ាក CRV មួយគ្រឿង ពណ៌ស ពាក់ស្លាកលេខ ភ្នំពេញ 1H-6148 បានបើកមកចតនៅក្បែរដើមក្ងោកចាស់មួយដើមនៅលើចិញ្ចើមផ្លូវ មួយសន្ទុះក្រោយមក ស្រាប់តែដើមក្ងោកនេះបានដាច់ឫសកែវរលំសង្កត់ទៅលើរថយន្ត និងរោងដំបូងលក់ចំណីអាហារសិស្សក្នុងសាលារៀនទួលស្វាយព្រៃ បណ្ដាលឲ្យខូចខាតយ៉ាងដំណំ តែមិនបង្កឲ្យមានអ្នកណារងរបួសឡើយ។

ក្នុងហេតុការណ៍នោះដែរ ប្រជាពលរដ្ឋបានសំណូមពរដល់អាជ្ញាធរ ពេលដើមឈើ សុំឲ្យជីករណ្ដៅឲ្យបានជ្រៅ ដើម្បីឲ្យដើមឈើមានទាំងនោះមានគ្រឹះរឹងមាំ ព្រោះកន្លងមកដើមឈើដែលអាជ្ញាធរដាំលើចិញ្ចើមផ្លូវគ្រាន់តែខ្យល់បក់ប៉ះក៏រលំដែរ។ ទន្ទឹមនឹងនេះប្រជាពលរដ្ឋសូមអាជ្ញាធរពិនិត្យមើលដើមឈើចាស់ៗ ឬពុកផុយ គួរតែកាប់ចោលមុនពេលរលំ៕