ផ្ទះ ព័ត៌មានជាតិ Update៖ នាំឪព...

Update៖ នាំឪពុកវិលទៅផ្ទះ ជាអកុសលស្លាប់តាមផ្លូវ ត្រូវរថយន្តទម្លាក់ចុះបើកគេចទៅបាត់

0

ភ្នំពេញ: បុរសចំណាស់ម្នាក់ ទើបវិលត្រឡប់មកពីកន្លែងកូនធ្វើការវិញ ធ្វើដំណើរឆ្ពោះទៅផ្ទះ រួមជាមួយកូនប្រុសស្រី ខណ:ដែលទើបដល់ពាក់កណ្តាលផ្លូវ ស្រាប់តែកើតមានអាការ:មិនស្រួលខ្លួន ខ្យល់គ ជួយមិនទាន់ រថយន្តឈ្នួលទម្លាក់ចុះ បើកចេញទៅបាត់ ជនរងគ្រោះត្រដរខ្យល់ស្លាប់បាត់ បង្កឲ្យភ្ញាក់ផ្អើល កាលពីវេលាម៉ោង១២ថ្ងៃត្រង់ ទី២៦ ខែឧសភា ឆ្នាំ២០២០ ត្រង់ចំណុចតាមផ្លូវចោមចៅ ក្បែរផ្សារចោមចៅ ក្រុម៤ ភូមិព្រៃជីសាក់ សង្កាត់ចោមចៅ៣ ខណ្ឌពោធិសែនជ័យ ។

សពជនរងគ្រោះឈ្មោះ ស៊ីម ធឿន ភេទប្រុស អាយុ ៥៣ឆ្នាំ មុខរបរ កសិករ មានទីលំនៅ ភូមិបឹងកណ្តាល ឃុំខ្ពបអាទាវ ស្រុកលើកដែក ខេត្តកណ្តាល ។

កូនប្រុសស្រីទាំង២នាក់ ឈ្មោះ ពឿន ធឿន ភេទប្រុស អាយុ ២៤ឆ្នាំ មុខរបរ កម្មករចម្ការស្វាយ ស្នាក់នៅចម្ការស្វាយ ភូមិព្រៃប្រសិទ្ធ ឃុំអូរបាក់រទេះ ស្រុកកំពង់សិលា ខេត្តព្រះសីហនុ មានស្រុកកំណើតនៅភូមិពោធិរៀង ឃុំកំពង់ឫស្សី ស្រុកពោធិរៀង ខេត្តព្រៃវែង ត្រូវជាកូនប្រសារ ។ មានប្រពន្ធឈ្មោះ ធឿន ស្រីនិច អាយុ ២០ឆ្នាំ មុខរបរ ស្នាក់នៅជាមួយគ្នា មានស្រុកកំណើត ភូមិបឹងកណ្តាល ឃុំខ្ពបអាទាវ ស្រុកលើកដែក ខេត្តកណ្តាល ត្រូវជាកូនបង្កើតរបស់សព ។

តាមសម្តីបុរសជាកូនប្រសារ បានឲ្យដឹងថា ឪពុកក្មេករបស់គេ បានទៅលេងពួកគេ ដល់ចម្ការស្វាយ កន្លែងពួកគេធ្វើការ ឯស្រុកកំពង់សិលា កាលពីព្រឹកថ្ងៃទី២៥ ម្សិលមិញ ខណ:ដែលគាត់មិនស្រួលខ្លួនផង លុះមកដល់ព្រឹកថ្ងៃទី២៦ ខែឧសភា ឆ្នាំ២០២០នេះ គេ២នាក់ប្តីប្រពន្ធ ក៏បានជូនឪពុក វិលត្រឡប់ឆ្ពោះទៅផ្ទះ ឯស្រុកលើកដែកវិញ ដោយធ្វើដំណើរតាមរថយន្តឈ្នួល សាំយ៉ុង ទើបតែដល់ក្បែរផ្សារចោមចៅ ផ្លូវចោមចៅ ស្រាប់តែឪពុកកើតមានអាការ: មិនស្រួលខ្លួន វិលងងឹតមុខខ្យល់គ ភ្លាមៗត្រូវបានរថយន្តឈ្នួលដាក់ទម្លាក់ចុះ ហើយបើកចេញចោលទៅបាត់ ជនរងគ្រោះ រួមជាមួយកូន២នាក់ នៅចិញ្ចើមផ្លូវ រកជួយមិនទាន់ ជនរងគ្រោះត្រដរខ្យល់ស្លាប់ បង្កឲ្យភ្ញាក់ផ្អើល សមត្ថកិច្ចចុះទៅពិនិត្យ សាកសួរ ជុំវិញរឿងហេតុ ។

សាកសព ដោយសារនៅចិញ្ចើមផ្លូវ កណ្តាលវាលក្តៅហែង ក្រុមគ្រួសារស្នើសុំដឹកសពទៅតំកល់ទុកនៅវត្តជម្ពូវ័នជាបណ្តោះអាសន្នសិន រង់ចាំឲ្យសមត្ថកិច្ចទៅពិនិត្យសាកសពនៅវត្តវិញ ។

ឆ្លងកាត់ការពិនិត្យ សាកសួរ ការបំភ្លឺរបស់ក្រុមគ្រួសារ ជនរងគ្រោះមានជំងឺប្រចាំកាយ ឈឺក្រពះរាំរ៉ៃ ហើយជនរងគ្រោះស្លាប់ដោយខ្យល់គ រួមជាមួយជំងឺផ្ទាល់ខ្លួន ពិនិត្យរួច សមត្ថកិច្ចប្រគល់សពជូនក្រុមគ្រួសារ ចាត់ចែងដឹកសពទៅធ្វើបុណ្យឯស្រុកតាមប្រពៃណី ៕

មតិយោបល់