កណ្តាល: នៅថ្ងៃពុធ ០៦កើត ខែជេស្ឋ ឆ្នាំជូត ឯកស័ក ព.ស.២៥៦៤ ត្រូវនឹងថ្ងៃទី២៧ ខែឧសភា ឆ្នាំ២០២០ វេលាម៉ោង០៧និង០០នាទី មានករណីបុរសកម្មករសំណង់ម្នាក់ បានដេកស្លាប់ នៅក្នុងការដ្ឋានសំណង់មួយកន្លែង ត្រង់ចំណុចភូមិម្លូម៉ឺន ឃុំផ្សារដែក ស្រុកពញាឮ ខេត្តកណ្ដាល ។
ជនរងគ្រោះឈ្មោះ ម៉ឹង ពិសិដ្ឋ ភេទប្រុស អាយុ៤៧ឆ្នាំ មុខរបរ កម្មករសំណង់ ជនជាតិខ្មែរ មានទីលំនៅភូមិផ្សារដែកក្រោម ឃុំផ្សារដែក ស្រុកពញាឮ ខេត្តកណ្តាល ។
សភាពនៃរឿងហេតុ៖ នៅមុនពេលកើតហេតុ ជនរងគ្រោះបានមកស្នាក់នៅធ្វើការងារសំណង់ នៅកន្លែងកើតហេតុខាងលើ ។ លុះដល់វេលាម៉ោង០៧និង០០នាទីព្រឹកថ្ងៃទី២៧ ខែឧសភា ឆ្នាំ២០២០ ឈ្មោះ ង៉ូវ សំគ័ង ហៅឌុយ ដែលត្រូវជាម្ចាស់ការដ្ឋានសំណង់ បានដើរទៅកន្លែងរោងជនរងគ្រោះស្នាក់នៅ ក៏ឃើញជនរងគ្រោះដេក ពុំព្រមក្រោកសោះ ភ្លាមនោះ ឈ្មោះង៉ូវ សំគ័ង ហៅ ឌុយ បានដើរចូលទៅដាស់ ទើបដឹងថាជនរងគ្រោះ បានដាច់ខ្យល់ស្លាប់បាត់ហើយ ។
បន្ទាប់មកក៏រាយការណ៍ជូនសមត្ថកិច្ចប៉ុស្ដិ៍រដ្ឋបាលផ្សារដែក និងបានបង្កើតគណ:កម្មការធ្វើការពិនិត្យ ។ សមាសភាពចូលរួមផ្នែកជំនាញពិនិត្យ និងវិភាគកន្លែងកើតហេតុស្រុក ប៉ុស្តិ៍រដ្ឋបាលផ្សារដែក ក្រុមប្រឹក្សាឃុំមេភូមិ គ្រូពេទ្យមណ្ឌល ឃើញថាសាកសព ក្បាល ដងខ្លួននិងអវ:យវ:មានសភាពរឹង ។ ក្រៅពីនឹងពុំមានស្លាកស្នាមអ្វីគួរឲ្យកក់សម្គាល់ឡើយ ។
ការសន្និដ្ឋាន តាមការពិនិត្យរបស់សមត្ថកិច្ចជំនាញ និងគ្រូពេទ្យ ជនរងគ្រោះ ស្លាប់ដោយសារខ្យល់គ សាកសពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
មតិយោបល់