ព័ត៌មានជាតិ

Update៖ អាសូរណាស់! ២នាក់ បងប្អូនទើបនឹងសឹកពីបួសបាន ៣ថ្ងៃ មកធ្វើការសំណង់នៅភ្នំពេញ អកុសលត្រូវរថយន្តបុកស្លាប់ប្អូន រីឯបងរងរបួសធ្ងន់

ភ្នំពេញ: យុវជនជាកម្មករសំណង់ម្នាក់បានស្លាប់ភ្លាមៗនៅកន្លែង ចំណែកម្នាក់ទៀតត្រូវជាបងបង្កើត បានរងរបួស ក្នុងហេតុការណ៍គ្រោះថ្នាក់ចរាចរមួយកើតឡើង ដោយរថយន្តកុងតៃន័រ របស់ក្រុមហ៊ុន តេង ឡាយ បើកបុកម៉ូតូ Beat កំពុងបើកបរលើផ្លូវអថិភាព កាលពីវេលាម៉ោង ១និង១០នាទីរសៀល ថ្ងៃទី២៨ ខែឧសភា ឆ្នាំ២០២០ នៅតាមផ្លូវបេតុង ក្នុងភូមិបឹងធំទី៣ សង្កាត់បឹងធំ ខណ្ឌកំបូល ។

ជនរងគ្រោះស្លាប់នៅកន្លែងឈ្មោះ ឌឹម សំភ័ស ភេទប្រុស អាយុ ១៨ឆ្នាំ មុខរបរ កម្មករសំណង់ ទើបតែសឹកពីបួសបាន ៣ថ្ងៃ ត្រូវជាប្អូន ចំណែកជនរងគ្រោះរបួសធ្ងន់ ជាបង មានឈ្មោះ ឌឹម សិទ្ធិ ភេទប្រុស អាយុ ២១ឆ្នាំ មុខរបរ កម្មករសំណង់ ហើយទាំង២នាក់ ស្នាក់នៅផ្ទះជួល ភូមិបឹងធំទី១ សង្កាត់បឹងធំ ខណ្ឌកំបូល មានស្រុកកំណើត ភូមិសេរីចំប៉ា ឃុំជ្រលង ស្រុកបារាយណ៍ ខេត្តកំពង់ធំ ។ ដោយឡែក អ្នកបើកបររថយន្តបង្ក សមត្ថកិច្ចឃាត់ខ្លួនបាន ឈ្មោះ ជុំ នាង ភេទប្រុស អាយុ ៥៨ឆ្នាំ មុខរបរ បើកបររថយន្ត ក្រុមហ៊ុន តេង ឡាយ មានទីលំនៅ ភូមិដក់ទឹក សង្កាត់ ស្វាយក្រវ៉ាន់ ក្រុងច្បាមន ខេត្តកំពង់ស្ពឺ ។

តាមប្រភពនៅកន្លែងបានឲ្យដឹងថា មុនកើតហេតុ រថយន្តកុងតៃន័រ ម៉ាកFUSO ពណ៌ត្រួយចេក ពាក់ផ្លាកលេខ ភ្នំពេញ 3E-3371 អូសសណ្តោងរ៉ឺម៉ក សឺមី ដឹកទូកុងតៃន័រ ពាក់ផ្លាកលេខ ភ្នំពេញ 4A-0902 បានបើកតាមផ្លូវបេតុងមានសួនទ្រូងផ្លូវចែកគន្លង ពីត្បូងទៅជើង តែលើផ្លូវបញ្ច្រាស លុះដល់ចំណុចខាងលើ បានបុកម៉ូតូ ម៉ាកBeat ពណ៌ស ពាក់ផ្លាកលេខ កំពង់ធំ 1O-2255 ជិះឌុបគ្នា២នាក់ បងប្អូន ក្នុងទិសដៅពីជើងទៅត្បូង ដែលបើកបរដោយជនរងគ្រោះជាបង បណ្តាលឲ្យស្លាប់ប្អូន របួសបង ម៉ូតូខ្ទេចមួយកំណាត់មុខ សមត្ថកិច្ចមូលដ្ឋានប្រចាំការក្បែរនោះឃាត់អ្នកបើកបរបាននាំទៅប៉ុស្តិ៍ ។

តាមកម្មករសំណង់នៅកន្លែងកើតហេតុបានឲ្យដឹងថា មុនកើតហេតុ ជនរងគ្រោះជិះម៉ូតូឌុបគ្នា ក្នុងគោលបំណង់ចូលធ្វើការងារនៅក្បែរកន្លែងកើតហេតុ ទើបតែដល់ចំណុចខាងលើ ស្រាប់តែរថយន្តបង្ក បើកបរលើផ្លូវបញ្ច្រាសមកបុកបណ្តាលឲ្យស្លាប់និងរបួសតែម្តង ។

ក្រោយកើតហេតុ ជនរងគ្រោះម្នាក់ត្រូវបានរថយន្តគ្លីនិកឯកជនដឹកយកទៅ ចំណែកសាកព សមត្ថកិច្ចជំនាញ ចុះទៅពិនិត្យ រួចប្រគល់សពជូនក្រុមគ្រួសារ ចាត់ចែងដកយកទៅធ្វើបុណ្យតាមប្រពៃណីឯស្រុកកំណើត ។ ដោយឡែករថយន្តបង្ក និងម៉ូតូ រួមទាំងអ្នកបើកបររថយន្តផង នគរបាលវាស់វែងរួចយកទៅរក្សាទុកនៅការិយាល័យចរាចរជើងគោក នៃស្នងការនគរបាលរាជធានីភ្នំពេញ កសាងសំណុំរឿងតាមនីតិវិធី ៕

មតិយោបល់