ភ្នំពេញ: បុរសជនជាតិបរទេសម្នាក់ បានដេកស្លាប់ ក្នុងបន្ទប់ជួលជាន់ទី១ បង្កឲ្យភ្ញាក់ផ្អើល កាលពីវេលាម៉ោង៧ព្រឹក ថ្ងៃទី០៥ ខែមិថុនា ឆ្នាំ២០២០ នៅជាន់ទី១ ភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិសែនជ័យ ។

ជនរងគ្រោះ ភេទប្រុស អាយុ៣៣ឆ្នាំ ជនជាតិបរទេស មុខរបរ អតីតគ្រូបង្រៀនភាសាអង់គ្លេស នៅសកលវិទ្យាល័យបញ្ញាសាស្ត្រ ខេត្តសៀមរាប ស្នាក់នៅបន្ទប់ជួលចំណុចខាងលើជាង១ខែមកហើយ។

តាមពលរដ្ឋស្នាក់នៅក្បែរខាង បានឲ្យដឹងថា ជនរងគ្រោះ ធ្លាប់វះកាត់បេះដូង ច្រើនលើកមកហើយ កើតជំងឺលើសឈាមផង ហើយរាល់ថ្ងៃ ចូលចិត្តផឹកស្រា។

មុនការភ្ញាក់ផ្អើល មិនឃើញជនរងគ្រោះ ចេញក្រៅហាត់ប្រាណដូចសព្វដង លុះពេលដែលមានស្ត្រីម្នាក់ ដើរទៅរកប្រមូលចានឆ្នាំង ស្រាប់តែប្រទះឃើញជនរងគ្រោះដេក ហៅមិនឆ្លើយ ប្រាប់ម្ចាស់ផ្ទះ មកហៅ ពិនិត្យមើលជាក់ស្តែង គឺស្លាប់បាត់ហើយ ទើបរាយការណ៍ទៅសមត្ថកិច្ច ចុះពិនិត្យជាក់ស្តែង៕