កំពង់ធំ: យោងតាមផេកការិយាល័យផ្សព្វផ្សាយតាមបណ្តាញសង្គមបានឲ្យដឹងថា ថ្ងៃព្រហស្បតិ៍ ៦ រោច ខែជេស្ធ ឆ្នាំជូត ទោស័ក ពស ២៥៦៤ ត្រូវនឹងថ្ងៃទី១១ ខែ មិថុនា ឆ្នាំ២០២០ វេលាម៉ោង ០៥ ទៀបភ្លឺ កម្លាំងនគរបាលខេត្តកំពង់ធំ បានប្រើប្រាស់វិធានការជំនាញបង្ក្រាបបទល្មើស លួចជ័រកៅស៊ូ និងទទួលផលចោរកម្ម ចំនួន ០១ ករណី ស្ថិតនៅភូមិសាស្ត្រស្រុក សន្ទុកខេត្តកំពង់ធំ ។

ប្រភពព័ត៌មានពីកម្លាំងជំនាញបានឲ្យដឹងថា ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ

កម្លាំងនគរបាលព្រហ្មទណ្ឌ នៃស្នងការដ្ឋាននគរបាលខេត្តកំពង់ធំ សហការជាមួយកម្លាំងប៉ុស្តិ៍នគរបាលរដ្ឋបាលបឹងល្វា បង្ក្រាប ទីតាំងទទួលទិញជ័រកៅស៊ូ ដែលកម្មករក្រុមហ៊ុន ភឿវ៉ាកំពង់ធំ អភិវឌ្ឍកៅស៊ូ លួចយកពីក្រុមហ៊ុនមកលក់ ស្ថិតនៅចំណុចភ្នំរាំង ក្នុងភូមិ ត្រពាំងទឹម ឃុំ បឹងល្វា ស្រុកសន្ទុក ខេត្តកំពង់ធំ ឃាត់ខ្លួនមនុស្ស០២នាក់៖

១.ឈ្មោះ អឿ វិចិត្រ ភេទ ប្រុស អាយុ ៣១ ឆ្នាំ ទីលំនៅ ភូមិឡ ឃុំកោងកាង ស្រុកពញាក្រែក ខេត្តត្បូងឃ្មុំ ស្នាក់នៅភូមិ ត្រពាំងទឹម ឃុំបឹងល្វា ស្រុក សន្ទុកខេត្តកំពង់ធំ (អ្នកបើកបររថយន្ត)។

២.ឈ្មោះ មុត ចន្ធី ភេទប្រុស អាយុ ៣៧ ឆ្នាំ នៅភូមិ ស្រែមាន ឃុំ ព្រះធាតុ ស្រុក អូររាំងឪ ខេត្តត្បូងឃ្មុំ ស្នាក់នៅភូមិ ត្រពាំងទឹម ឃុំ បឹងល្វា ស្រុក សន្ទុកខេត្តកំពង់ធំ (ជាអ្នកទទួលទិញ) ចំណែកជនសង្ស័យដែលជាអ្នកលួចយកមកលក់បានរត់គេចខ្លួន។

សមត្ថកិច្ចរឹបអូសបានវត្ថុតាង៖ រថយន្តកូរ៉េ ២តោន កន្លះ ចំនួន ០២ គ្រឿង,ម៉ូតូ ចំនួន ០៣ គ្រឿង, ជញ្ជីងថ្លឹងកៅស៊ូ ០១,កញ្ឆេ ០២ និងជ័រកៅស៊ូបង្កក ទម្ងន់១០,៥៩០kg ។

ដោយមានការសម្របសម្រួលនីតិវិធី ពីព្រះរាជអាជ្ញាអមសាលាខេត្តកំពង់ធំ នៅថ្ងៃ.ខែ.ឆ្នាំ ដដែលជនសង្ស័យ រួមទាំងវត្ថុតាង ខាងលើ ត្រូវបានកម្លាំងការិយាល័យនគរបាលព្រហ្មទណ្ឌកម្រិតស្រាល បញ្ជូនមកស្នងការដ្ឋាននគរបាលខេត្តកំពង់ធំ បន្តកសាងសំណុំរឿង ដើម្បីបញ្ជូនទៅស្ថាប័ន អយ្យការអមសាលាដំបូងខេត្តកំពង់ធំ ដើម្បីបន្តនីតិវិធី។

លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានស្នើដល់បងប្អូនប្រជាពលរដ្ឋ សូមចូលរួមសហការ ជាមួយសមត្ថកិច្ច នៅពេលដែលជួបប្រទះអំពើល្មើសច្បាប់នានា សូមបងប្អូនរួសរ៉ាន់រាយការណ៍ មកសមត្ថកិច្ចជំនាញដើម្បីសមត្ថកិច្ច មានមូលដ្ឋានបង្ក្រាបបានទាន់ពេលវេលា ៕