បន្ទាយមានជ័យ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ក្រោយពីមានសេចក្តីជូនដំណឹងបន្ទាន់មួយ របស់រដ្ឋបាលខេត្តបន្ទាយមានជ័យ ជូនបងប្អូនអាជីវករលក់ដូរទំនិញតាមតូប ឲ្យផ្អាកការលក់ដូរនូវប្រភេទ ស្រាថ្នាំឈ្មោះស្រាថ្នាំចិនសែន ប៉ូវកម្លាំង តាំង កួយ នៅគ្រប់ទីផ្សារទាំងអស់ និងតាមលំនៅដ្ឋាន មូលហេតុ ដោយប៉ុន្មានថ្ងៃកន្លងមកនេះមានបងប្អូនយើង នៅក្នុងស្រុកមង្គលបូរី ស្រុកម៉ាឡៃ និងក្រុងប៉ោយប៉ែត សង្ស័យថាទទួលទានស្រាចិនសែន តាំង កួយ នេះ បណ្តាឲ្យស្លាប់ និងយកទៅសង្រ្គោះបន្ទាន់នៅមន្ទីរពេទ្យជាច្រើននាក់ ។

យោងតាមរបាយការណ៍របស់មន្ត្រីនគរបាលបានឲ្យដឹងថា ប្រជាពលរដ្ឋដែលបានស្លាប់ដោយសង្ស័យថា ពុលស្រាចិនសែន តាំង កួយ កើនឡើង០២នាក់បន្ថែមទៀត សរុបចំនួន០៦ នាក់ និងត្រូវបានសង្រ្គោះបន្ទាន់ជាបន្តបន្ទាប់ នៅក្នុងមន្ទីរពេទ្យមានការកើនឡើងសរុបចំនួន៣២នាក់ ហើយបានបញ្ជូនទៅពេទ្យសៀមរាបចំនួន០៣នាក់ និងម្នាក់ធ្ងន់កំពុងលាងឈាមសង្គ្រោះបន្ទាន់ ។
ដោយមានបទបញ្ជាយ៉ាងម៉ឺងម៉ាត់របស់លោក អ៊ុំ រាត្រី អភិបាលខេត្តបន្ទាយមានជ័យនោះ កាលពីថ្ងៃទី ១០.១១ ខែ​មិថុនា ឆ្នាំ២០២០ មកទល់ពេលនេះ មន្រ្តីសាខាកាំកុងត្រូលខេត្ត មន្រ្តីនៃមន្ទីរពាណិជ្ជកម្មខេត្ត សហការជាមួយអាជ្ញាធរមូលដ្ឋាន និងសមត្ថកិច្ចចម្រុះ បានចុះធ្វើការដកហូតប្រភេទស្រាថ្នាំចិនសែន ម៉ាក តាំង កួយ ដែលគេសង្ស័យថា មានសារធាតុពុល បណ្តាលឲ្យមនុស្សស្លាប់ និងសង្រ្គោះបន្ទាន់នៅមន្ទីរពេទ្យជាច្រើននាក់ ។

ជាលទ្ធផលសរុបដែលមន្រ្តីជំនាញដកហូត បាននូវប្រភេទស្រាថ្នាំចិនសែន តាំង កួយ នេះរួមមាន៖ ក្រុងសិរីសោភ័ណ ១ទីតាំងសរុបចំនួន​៩១៨ដបស្មើ និង ៤៥៩លីត្រ ស្រុកថ្មពួក៣ទីតាំងមាន ១៤៤ ដបស្មើ ៧២ លីត្រ ក្រុងប៉ោយប៉ែត១៥ ទីតាំងមានចំនួន១២,៩២៧ ដបស្មើ ៦,៤៦៣លីត្រ សរុប១៩ ទីតាំងស្មើ១៣,៩៨៩ដប និង ៦៩,៩៤៥លីត្រ ។

សូមបញ្ជាក់ថា លោក ប៊ុក ឡាយជី ប្រធានមន្ទីរពាណិជ្ជកម្ម ខេត្តបានឲ្យដឹងថា នាថ្ងៃបន្ទាប់ មន្រ្តីជំនាញ បានចុះធ្វើការដកហូតនូវប្រភេទ ស្រាថ្នាំចិនសែន តាំង កួយ នេះជាបន្តបន្ទាប់ក្នុងផ្សារ ឬតូបលក់តាមភូមិ​ ឃុំមួយចំនួនក្នុងខេត្តបន្តទៀត ៕