ព័ត៌មានជាតិ

បុរសជាយោធាម្នាក់ ធ្លាក់ពីលើ​សណ្ឋាគារ​​អាស៊ានជាន់ទី៣ កម្ពស់ ១០ម៉ែត្រ បណ្តាល​ឲ្យ​ស្លាប់ នៅខេត្តកោះកុង

​កោះកុង: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា បុរស​ម្នាក់​រស់នៅ​រាជធានី​ភ្នំពេញ​ បាន​ទៅ​លេង​នៅ​ខេត្តកោះកុង​ ជាមួយ​បងប្អូន​ ហើយ​ស្នាក់​នៅ​សណ្ឋាគារ​អាស៊ាន​ នៅ​ជាន់​ទី​៣​ ដែល​មាន​កម្ពស់​១០​ម៉ែត្រ​ ក៏​បាន​ធ្លាក់​ពី​សណ្ឋាគារ​បណ្តាល​ឲ្យ​ស្លាប់​ នៅ​ព្រឹក​ថ្ងៃ​ទី​១៩​ ខែមិថុនា​ ឆ្នាំ​២២០​ នៅ​វេលា​ម៉ោង​៧​និង​២៥​នាទី​ព្រឹក​ នៅ​ចំណុច​សណ្ឋាគារ​អាស៊ាន​ ស្ថិត​ក្នុងភូមិ​១​ សង្កាត់​ស្មាច់​មាន​ជ័យ​ ។​

​តាម​របាយការណ៍​របស់​សមត្ថកិច្ច​បាន​ឲ្យ​ដឹង​ថា​ ជន​រង​គ្រោះ​ឈ្មោះ​ វណ្ណ​ ព្រឹក្សា​ ភេទ​ប្រុស​ អាយុ​៤៥​ឆ្នាំ​ ជនជាតិ​ខ្មែរ​ មុខរបរ​យោធា​ ទីលំនៅ​ខណ្ឌមានជ័យ​ ភ្នំពេញ​ បាន​មក​ដើរ​លេង​ នឹង​ស្នាក់​នៅ​សណ្ឋាគារ​អាស៊ាន​ ។​

​ក្រោយ​ពី​បាន​ទទួល​ព័ត៌មាន​ កម្លាំង​អធិការដ្ឋាន​ បាន​សហការ​ជាមួយ​ជំនាញ​នគរបាល​ខេត្ត​ ទៅ​ពិនិត្យ​កន្លែង​កើតហេតុ​ និង​សាកសព​នៅ​មន្ទីរពេទ្យ​ខេត្ត​ បាន​ឲ្យ​ដឹង​ថា​ ៖​ ជន​រង​គ្រោះ​មាន​ជំងឺលើសឈាម​ ហើយ​យប់​ថ្ងៃ​ទី​១៨​ ខែមិថុនា​ ឆ្នាំ​២០២០​ ជន​រង​គ្រោះ​បាន​ហូប​ស្រា​ជាមួយ​បងប្អូន​នៅ​មាត់សមុទ្រ​ដល់​ម៉ោង​២​និង​០០​រំលង​អា​ធ្រា​ត្រ​ ទើប​ចូល​បន្ទប់​សណ្ឋាគារ​វិញ​ លុះ​ព្រឹក​ឡើង​ជន​រង​គ្រោះ​បាន​មក​ឈរ​នៅ​វេរ៉ង់ដា​មុខ​បន្ទប់​ខ្លួន​ដេក​ ក៏​ធ្លាក់​មក​ក្រោម​។​
​ជន​រង​គ្រោះ​មាន​ស្នាម​របួស​ បែកក្បាល​ខាងក្រោយ​ប្រវែង​ ៥​ស​.​ម​ ជំរៅ​១,៥​ ស​.​ម​ ហូរ​ឈាម​តាម​ច្រមុះ​ ត្រចៀក​ បាក់ឆ្អឹង​ជំនី​ខាងឆ្វេង​និង​ខៀវ​ភ្នែក​ទាំង​សងខាង​។​

​ក្រោយ​ពី​ពិនិត្យ​រួច​និង​មានការ​អនុញ្ញាត​របស់​ព្រះរាជអាជ្ញា​ បាន​ប្រគល់​សាកសព​ឲ្យ​ទៅ​ប្រពន្ធ​យក​ទៅ​ធ្វើបុណ្យ​តាម​ប្រពៃណី​៕

មតិយោបល់