បាត់ដំបង: យោងតាមផេកផ្សព្វផ្សាយអប់រំ ក្រសួងមហាផ្ទៃបានឲ្យដឹងថា តាមរបាយការណ៍របស់ការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តបាត់ដំបង កាលពីថ្ងៃអង្គារ ៣​កើត ខែអាសាឍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៣ ខែមិថុនា ឆ្នាំ២០២០ វេលាម៉ោង ១២:២០ នាទី នៅចំណុចក្រុមទី៨ ភូមិតាកុក ឃុំនរា ស្រុកសង្កែ ខេត្តបាត់ដំបង កម្លាំងផ្នែកប្រឆាំងគ្រឿងញៀន សហការជាមួយកម្លាំងផ្នែកព្រហ្មទណ្ឌ នៃអធិការរដ្ឋាននគរបាលស្រុកសង្កែ បានចុះល្បាតក្នុងភូមិសាស្ត្រខាងលើ បង្ក្រាបបានករណីរក្សាទុកដោយខុសច្បាប់នូវសារធាតុញៀន ០១ករណី ក្នុងបទល្មើសជាក់ស្ដែង។

ក្នុងកិច្ចប្រតិបត្តិការសមត្ថកិច្ចយើងចាប់ឃាត់ខ្លួនជនសង្ស័យបានចំនួន២នាក់ មានឈ្មោះដូចខាងក្រោម៖ ១-ឈ្មោះ នួម យ៉ានុត ភេទ ស្រី អាយុ ២១ ឆ្នាំ​ មានទីលំនៅភូមិជ្រៃកោង សង្កាត់ស្លាកែត ក្រុងបាត់ដំបង ខេត្តបាត់ដំបង។ ២-ឈ្មោះ ង៉ា សំរិទ្ធ ភេទ ប្រុស អាយុ ១៩ ឆ្នាំ មានទីលំនៅភូមិរំចេក២ សង្កាត់រតន: ក្រុងបាត់ដំបង ខេត្តបាត់ដំបង។ វត្ថុតាងចាប់យកបានរួមមានថ្នាំញៀនប្រភេទមេតំហ្វេតាមីន (ម៉ាទឹកកក ICE) ចំនួន ០៣កូនថង់ ទម្ងន់ ៣,៧៨ក្រាម (ទាំងសំបក), ទូរស័ព្ទដៃ ចំនួន ១គ្រឿង ចាស់, ថង់សម្រាប់រំលែកច្រកថ្នាំញៀនលក់មួយចំនួន, ម៉ូតូចំនួន ០១គ្រឿង ម៉ាកហុងដាឌ្រីម (HONDA DREAM) ពណ៌ខ្មៅសេរីឆ្នាំ ២០១៣ ពាក់ស្លាកលេខ បាត់ដំបង-1M-7868 ដែលមានលេខតួ និងលេខម៉ាស៊ីន ND125ME-8802572 ។

ជនល្មើស និងវត្ថុតាងបច្ចុប្បន្នបាននឹងកំពុងរៀបចំសំណុំរឿងបញ្ជូនទៅតុលាការខេត្តបាត់ដំបង។ សួន ស៊ីរ៉ា