ពោធិ៍សាត់: យោងតាមអគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់ ត្រូវបានសមត្ថកិច្ចចាប់ឃាត់ខ្លួនកាលពីវេលាម៉ោង ១០និង៤៥នាទី ព្រឹកថ្ងៃទី១៧ ខែកក្កដា ឆ្នាំ២០២០ បន្ទាប់ពីយកសាំងចាក់ដុតផ្ទះប្រជាពលរដ្ឋឆេះអស់១ខ្នង។
ម្ចាស់ផ្ទះរងគ្រោះ ឈ្មោះ ស៊ិន ស៊ីធារី ភេទស្រី អាយុ៤១ឆ្នាំ រស់នៅភូមិអូរស្តៅ សង្កាត់ស្វាយអាត់ ក្រុងពោធិ៍សាត់បណ្តាលឲ្យឆេះផ្ទះទាំងស្រុង មាន ទំហំ៦×៧ម៉ែត្រ ជញ្ជាំងក្តាប្រក់ស័ង្កសី ខណ:ម្ចាស់មិននៅចេញទៅកាត់ដេរនៅរោងចក្រមួយកន្លែងស្ថិតក្នុងស្រុកក្រគរ ។
លោកវរសេនីយ៍ត្រី សុខ មេសា អធិការរងនគរបាលក្រុងពោធិ៍សាត់ បានឲ្យដឹងថា ជនសង្ស័យឈ្មោះ ងឿម សំណាង ភេទប្រុស អាយុ២៨ឆ្នាំ រស់នៅភូមិជើងភ្លើង ឃុំស្នាមព្រះ ស្រុកបាកាន ខេត្តពោធិ៍សាត់ ដើរមកយកសាំងពីតូបលក់ដូររបស់ ឈ្មោះ ចិន ភេទប្រុស អាយុ២៦ឆ្នាំ រស់នៅភូមិ សង្កាត់ជាមួយជនរងគ្រោះខាងលើ ចំនួន១លីត្រ ហើយរត់ចូលក្នុងផ្ទះជនរងគ្រោះចាក់សាំងដុតតែម្តង បណ្តាលឲ្យឆេះផ្ទះ១ខ្នង និងទ្រព្យសម្បត្តិមានជាច្រើនទៀត ។
លោកអធិការរងបានបន្តថា ដោយមានការអន្តរាគមន៍ពន្លត់អគ្គីភ័យពីសមត្ថកិច្ច បានប្រើរថយន្តពន្លត់អគ្គិភ័យនៃស្នងការដ្នាននគរបាលខេត្តពោធិ៍សាត់ចំនួន០២ គ្រឿង។
ប្រភពដដែល បានបន្តទៀតថា ករណីអគ្គិភ័យនេះបណ្តាលមកពីជនសង្ស័យ ប្រើប្រាស់គ្រឿងញៀនហួសកម្រិត ទើបហ៊ានធ្វើអំពើបែបនេះ។
ក្នុងពេលកើតហេតុនោះដែរ ជនបង្ក ត្រូវបានសមត្ថកិច្ចឃាត់ខ្លួនយកទៅកាន់អធិការដ្នាននគរបាលក្រុងពោធិ៍សាត់ ដើម្បីចាត់ការតាមនីតិវិធីច្បាប់៕
មតិយោបល់