កណ្តាលៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ផ្ទះរបស់ប្រជាពលរដ្ឋ១ខ្នង រួមនឹងទ្រព្យសម្បត្តិត្រូវបានអគ្គិភ័យឆាបឆេះបំផ្លិចបំផ្លាញទាំងស្រុង ដោយសារករណីទុស្សេខ្សែភ្លើង នៅវេលាម៉ោង១០និង៣០នាទីព្រឹក ថ្ងៃទី២៥ ខែកក្កដា ឆ្នាំ២០២០ ស្ថិតនៅភូមិអង្គតាសិត ឃុំទួលព្រេជ ស្រុកអង្គស្នួល ខេត្តកណ្ដាល ។
លោកវរសេនីយ៍ឯក ឆាំ ប៊ុនធឿន ស្នងការរង ទទួលការិយាល័យអគ្គិភ័យនៃស្នងការដ្ឋាននគរបាលខេត្តកណ្តាល បានឲ្យដឹងថា ក្នុងហេតុការណ៍នេះ កម្លាំងអន្តរាគមន៍របស់ អធិការដ្ឋាននគរបាលស្រុកអង្គស្នួលបានចេញប្រតិបត្ដិការ សហការជាមួយកម្លាំងប៉ុស្ដិ៍ទួលព្រេជ ប្រជាការពារ សិស្សសាលានាយទាហានសកម្ម និងប្រជាពលរដ្ឋចំនួនជាច្រើននាក់ បានជួយពន្លត់ភ្លើងឆេះនៅចំណុចខាងលើ ដោយប្រើរថយន្តពន្លត់អគ្គិភ័យរបស់ការិយាល័យខេត្ត ចំនួន០៣គ្រឿង រថយន្តរបស់អធិការដ្ឋាននគរបាលស្រុកឧដុង្គ០១គ្រឿង រថយន្តរបស់សាលានាយទាហានសកម្ម០១គ្រឿង ប្រើប្រាស់ទឹកអស់ចំនួន០៥ស៊ីទែន បានរលត់ជាស្ថាពរ ។
ក្នុងហេតុការណ៍នេះ បណ្តាលឲ្យផ្ទះ០១ខ្នង រងការឆេះបំផ្លាញទាំងស្រុង ផ្ទះទំហំ ៦mx៨m ធ្វើអំពីឈើលើ ថ្មក្រោម ជញ្ជាំងក្ដារ ប្រក់ក្បឿង ។
ម្ចាស់ផ្ទះរងគ្រោះឈ្មោះ តេង វី ភេទប្រុស អាយុ៣៣ឆ្នាំ ប្រពន្ធឈ្មោះ ស៊ីម ដា អាយុ៣៣ឆ្នាំ សម្ភារៈប្រើប្រាស់ក្នុងផ្ទះឆេះទាំងស្រុង ។
លោកស្នងការរងបន្តថា ពាក់ព័ន្ធនឹងករណីនេះ បើតាមការបំភ្លឺរបស់ឈ្មោះ តេង ណែត ភេទស្រី អាយុ៣០ឆ្នាំ ត្រូវជាប្អូនបង្កើតម្ចាស់ផ្ទះដែលមានផ្ទះនៅជិតគ្នាបានឲ្យដឹងថា មូលហេតុមកពីទុស្សេខ្សែភ្លើងហើយបង្កជាអគ្គិភ័យឆាបឆេះតែម្តង ៕
មតិយោបល់