កែប: យោងតាមផេកការិយាល័យផ្សព្វផ្សាយតាមបណ្តាញសង្គមបានឲ្យដឹងថា ព្រឹកថ្ងៃច័ន្ទ ទី១៧ ខែសីហា ឆ្នាំ២០២០ ឯកឧត្តម សោម ពិសិដ្ឋ អភិបាល នៃគណ:អភិបាលខេត្តកែប ដឹកនាំមន្រ្តីជំនាញ និងយុវជនចុះត្រួតពិនិត្យការរៀបចំជញ្ជីងយុត្តិធម៌នៅផ្សារក្តាម ដើម្បីទទួលបានតម្លាភាពទាំងអ្នកទិញ អ្នកលក់។
ក្នុងការចុះត្រួតពិនិត្យដោយផ្ទាល់ជាមួយមន្រ្តីជំនាញនាថ្ងៃនេះ ឯកឧត្តមមានប្រសាសន៍ថា ឯកឧត្តមផ្ទាល់តែងតែលឺពាក្យថា អាជីវករនៅផ្សារក្តាមខេត្តកែប លក់ដូរកោរភ្ញៀវមិនដាក់ទឹក ហើយថ្លឹងគីឡូឲ្យភ្ញៀវមិនគ្រប់គីឡូទៀត។ ពេលនេះ រដ្ឋបាលខេត្ត បានចាត់មន្រ្តីជំនាញមកដាក់បន្ថែមទៀតនូវទីតាំងជញ្ជីងយុត្តធម៍ស្ទើតែគ្រប់ទីកន្លែងនៅក្នុងផ្សាក្តាម ហេតុនេះបងប្អូនភ្ញៀវទេសចរលែងមានក្តីបារម្ភទៀតហើយ។
ករណីពេលដែលទិញពីអាជីវករនៅផ្សារក្តាមហើយបងប្អូនមានការសង្ស័យថា ទំនិញមិនគ្រប់គីឡូ បងប្អូនអាចយកមកដាក់ថ្លឹងនៅជញ្ជីងយុត្តិទាំងនេះបាន ដោយឥតគិតថ្លៃ ដែលមានចំនួន០៤ទីតាំង នៅផ្សារក្តាមនេះ ។
ឯកឧត្តមអភិបាលខេត្ត បានបន្ថែមទៀតថា ករណីដែលមន្ត្រីជំនាញរកឃើញថា មានអាជីវកររូបណា លក់ឥវ៉ាន់ឲ្យភ្ញៀវ បានក្លែងបន្លំមិនគ្រប់គីឡូ អាជីវកររូបនោះនឹងទទួលនូវការប្រមាណពីរដ្ឋបាលខេត្ត ឬបិទកន្លែងអាជីវកម្ម និងអាចទទួលខុសត្រូវជាមួយច្បាប់ទៀតផង។
បន្ទាប់ពីបានត្រួតពិនិត្យទីតាំងដាក់ជញ្ជីងយុត្តិធម៌រួចមក ឯកឧត្តមអភិបាលខេត្ត និងក្រុមការងារ បានចុះអប់រំ ណែនាំ ផ្សព្វផ្សាយពីវិធានការណ៍ការពារជំងឺកូវីដ-១៩ ព្រមទាំងបានចែកម៉ាស់ និងខិតបណ្ណផ្សព្វផ្សាយ ដល់បងប្អូនអាជីវករ និងភ្ញៀវទេសចរជាតិ អន្តរជាតិដែលមកកម្សាន្តនៅខេត្តកែបផងដែរ ៕
មតិយោបល់