ភ្នំពេញៈ ករណីគ្រោះថ្នាក់ចរាចរណ៍ លោកតាម្នាក់ បានជិះម៉ូតូ មិនប្រយ័ត្នទៅបុក រថយន្តស៊េរីទំនើបមួយគ្រឿង បណ្ដាលឲ្យរងរបួសធ្ងន់ បាក់ភ្លៅខាងឆ្វេង។

ហេតុការណ៍នេះ បានកើតឡើងកាលពីវេលាម៉ោង ១និង១០ នាទីថ្ងៃទី ២៦ ខែសីហាឆ្នាំ ២០២០ តាមបណ្តោយផ្លូវព្រះមុនីវង្ស ត្រង់ចំណុចមុខទូតបារាំង ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ម៉ូតូរងគ្រោះម៉ាក ឌ្រីមសង់ស៊េរីឆ្នាំ 98 ពណ៌ខ្មៅ ពាក់ផ្លាកលេខ អក្សរ ត1394 ភព1 អ្នកបើកបររងរបួសធ្ងន់ បាក់ភ្លៅខាងឆ្វេង មានអាយុប្រហែលជាង៦០ឆ្នាំ។ ចំណែកឯរថយន្តស៊េរីទំនើបនោះ ម៉ាកឡង់គ្រីស័រ ពណ៌ខ្មៅ ពាក់ផ្លាកលេខ ភ្នំពេញ 2BM-6768 អ្នកបើកមានអាយុប្រហែលជាង ៤០ឆ្នាំ។

តាមប្រភពព័ត៌មានពីកន្លែងកើតហេតុ បានឱ្យដឹងថា នៅមុនកើតហេតុ គេឃើញរថយន្តខាងលើ ធ្វើដំណើរតាមបណ្តោយផ្លូវ ព្រះមុនីវង្សក្នុងទិសដៅពីត្បូងមកជើង ខណៈមកដល់ចំណុចកើតហេតុ ស្រាប់តែមានម៉ូតូមួយគ្រឿង ជិះម្នាក់ឯង ធ្វើដំណើរតាមបណ្ដោយផ្លូវព្រះមុនីវង្ស ក្នុងទិសដៅពីជើងមកត្បូង។មកដល់ចំណុចកើតហេតុ បានរេចង្កូតទៅបុករថយន្តចំពីមុខពេញទំហឹង បណ្ដាលឲ្យរងរបួសធ្ងន់ភ្លៅខាងឆ្វេង។

ភ្លាមៗផងដែរ សមត្ថកិច្ចមូលដ្ឋាន បានចុះដល់កន្លែងកើតហេតុធ្វើការវាស់វែង យករថយន្ តនិងម៉ូតូអែបខាង និងហៅរថយន្តសាមុយដឹកជនរងគ្រោះ យកទៅសង្គ្រោះបន្ទាន់ នៅមន្ទីរពេទ្យកាល់ម៉ែត

ក្រោយកើតហេតុម្ចាស់រថយន្ត បានជួយចេញថ្លៃព្យាបាលរបួស ក្នុងន័យមនោសញ្ចេតនាទៅម្ចាស់ម៉ូតូចំនួន ២០០ដុល្លារ ដើម្បីបញ្ចប់រឿងនៅកន្លែងកើតហេតុ៕